ڈومیسٹک کرکٹ کے بجٹ میں ایک ارب روپے کے اضافے کی منظوری

06-29-2026

(لاہور نیوز) ڈومیسٹک کرکٹ کے بجٹ میں ایک ارب روپے کے اضافے کی منظوری دے دی گئی۔

چیئرمین پاکستان کرکٹ بورڈ محسن نقوی کی زیر صدارت پی سی بی بورڈ آف گورنرز کا 84واں اجلاس منعقد ہوا، چیف فنانشل آفیسر پی سی بی جاوید مرتضی نے نئے مالی سال کے بجٹ کے خدوخال اور اعدادوشمار بارے بریفنگ دی۔ چیف آپریٹنگ آفیسر پی سی بی سمیر احمد، چیف ایگزیکٹو آفیسر پی ایس ایل سلمان نصیر اور تمام ڈائریکٹرز  نے اجلاس میں شرکت کی۔ اجلاس میں نئے مالی سال 27 -2026 کے سرپلس بجٹ کی متفقہ منظوری دی گئی، علاوہ ازیں اجلاس میں پی ایس ایل 12 کے بجٹ اور پی ایس ایل کو انتظامی و مالیاتی طور پر خودمختار بنانے کی منظوری بھی دی گئی۔ اجلاس میں ڈومیسٹک کرکٹ کے بجٹ میں ایک ارب روپے کے اضافے کی منظوری، بجٹ 3 ارب روپے سے بڑھا کر 4 ارب روپے کرنے کا فیصلہ کیا گیا ہے جبکہ نئے سینٹرل کنٹریکٹ کے فارمیٹ و ادائیگی کے طریقہ کار اور قومی کرکٹ ٹیم کے کھلاڑیوں کے لئے میچ فیس میں اضافے کی منظوری دی گئی ہے۔ اجلاس میں قائداعظم ٹرافی کے پلیئرز کیلئے میچ فیس میں خاطر خواہ اضافہ، کھلاڑیوں کی میچ فیس 30 ہزار روپے سے بڑھا کر ایک لاکھ روپے کرنے، ویمنز ون ڈے اور ٹی ٹوئنٹی ٹورنامنٹس کے انعقاد اور اس ضمن میں فنڈز مختص کرنے اور 12 مزید گراؤنڈز کو آپریشنل کرنے اور ہیومن ریسورس کیلئے فنڈز مخصوص کرنے کی منظوری دی گئی۔ منعقدہ اجلاس میں ریزرو پلیئرز کی میچ فیس 15 ہزار روپے سے بڑھا کر 50 ہزار روپے کرنے، ریجنل گراؤنڈ سٹاف کی کم از کم تنخواہ 42 ہزار روپے کرنے کا فیصلہ کیا گیا جبکہ نیشنل بینک کرکٹ سٹیڈیم کراچی اور دیگر انفراسٹرکچر کی اپ گریڈیشن کیلئے 6 ارب 70 کروڑ روپے کے فنڈز مختص کرنے کی منظوری بھی دی گئی۔ اجلاس میں بی او جی کے گزشتہ میٹنگ کے فیصلوں کی توثیق کی گئی ہے جبکہ ہائی پرفارمنس سینٹر لاہور میں بائیو میکینس مشین لگانے کے لئے فنڈز مختص کرنے کی منظوری بھی دی گئی۔ اجلاس میں بی او جی کے ممبران انوار غنی، چیف سیکرٹری پنجاب زاہد اختر زمان، اسماعیل قریشی، سجاد کھوکھر، تنویر احمد اور عدنان ملک  نے شرکت کی، علاوہ ازیں ظہیر عباس، ایڈیشنل سیکرٹری کابینہ ڈویژن میر حسن نقوی اور دیگر حکام بھی شریک تھے۔