گل فیروزہ کو آسٹریلیا میچ میں ضابطہ اخلاق کی خلاف ورزی پر وارننگ جاری

06-26-2026

(لاہور نیوز) پاکستان ویمنز کرکٹ ٹیم کی اوپنر کی جانب سے میچ کے دوران جذباتی ردِعمل پر میچ آفیشلز نے کارروائی کرتے ہوئے ضابطہ اخلاق کے تحت وارننگ جاری کر دی ہے۔ واقعے کے بعد کھلاڑی کے رویے پر بھی توجہ مرکوز ہو گئی ہے۔

رپورٹس کے مطابق گل فیروزہ کو ویمنز ٹی20 ورلڈ کپ میں آسٹریلیا کے خلاف میچ کے دوران ضابطہ اخلاق کے لیول ون کی خلاف ورزی کا مرتکب قرار دیا گیا۔ واقعہ پاکستانی اننگز کے دوسرے اوور میں پیش آیا جب گل فیروزہ آؤٹ ہونے کے بعد مایوسی اور غصے کا اظہار کرتے ہوئے ٹیم ڈگ آؤٹ کے قریب اپنا بیٹ اور گلووز جارحانہ انداز میں پھینکتی نظر آئیں۔ میدان میں موجود آفیشلز  نے اس عمل کو کھیل کے ضابطوں اور سپورٹس مین سپرٹ کے خلاف قرار دیا، جس کے بعد کھلاڑی کو باضابطہ وارننگ جاری کی گئی۔ کرکٹ میں ضابطہ اخلاق کی لیول ون خلاف ورزی عموماً غیر کھیلوں والے رویے یا میدان میں نامناسب ردِعمل سے متعلق ہوتی ہے، جس پر ابتدائی سطح کی تادیبی کارروائی عمل میں لائی جاتی ہے۔