سپریم کورٹ: حق مہر میں دی گئی جائیداد کی منتقلی سے متعلق اہم قانونی اصول طے

05-11-2026

(لاہور نیوز) سپریم کورٹ نے حق مہر میں دی گئی جائیداد کی منتقلی سے متعلق اہم قانونی اصول طے کر دیئے۔

جسٹس شکیل احمد نے تحریری فیصلہ جاری کیا۔ سپریم کورٹ نے تحریری فیصلہ میں لکھا مشترکہ جائیداد کا کوئی بھی حصہ دار اپنے موروثی حصے سے زیادہ جائیداد منتقل نہیں کر سکتا، شوہر مشترکہ جائیداد میں صرف اپنے حصے کی حد تک حق مہر دے سکتا ہے، پورے گھر کو حق مہر میں دینے کا دعویٰ دیگر قانونی ورثاء کے حقوق پر اثر انداز نہیں ہو سکتا۔ سپریم کورٹ نے نکاح رجسٹرار اور نکاح خواں کو حق مہر میں درج جائیداد کی ملکیت کی تصدیق کرنے کی ہدایت کرتے ہوئے غیر ضروری قانونی چارہ جوئی سے بچنے کیلئے نکاح نامہ میں جائیداد کی ملکیت سے متعلق علیحدہ کالم شامل کرنے کا حکم دے دیا۔ عدالت نے فیصلے کی کاپی تمام صوبوں کے چیف سیکرٹریز کو ضروری کارروائی اور عملدرآمد کیلئے بھیجنے کی ہدایت کر دی، علاوہ ازیں سپریم کورٹ نے پشاور ہائی کورٹ کے فیصلے کے خلاف سول پٹیشن بھی خارج کر دی۔