پی ایس ایل 11 فائنل: وزیراعظم شہباز شریف نے تماشائیوں کو سٹیڈیم آنے کی اجازت دیدی

04-25-2026

(لاہور نیوز) چیئرمین پی سی بی محسن نقوی نے کہا ہے کہ وزیراعظم شہباز شریف نے پاکستان سپر لیگ (پی ایس ایل) کے 11ویں ایڈیشن کے فائنل میں شائقینِ کرکٹ کو سٹیڈیم آنے کی اجازت دے دی ہے۔

سماجی رابطے کی ویب سائٹ پر جاری بیان میں محسن نقوی نے بتایا کہ انہوں  نے وزیراعظم سے تماشائیوں کو سٹیڈیم میں داخلے کی اجازت دینے کی درخواست کی تھی، ان کے مطابق وزیراعظم خود بھی شائقین کو اجازت دینے کے حق میں تھے، تاہم ملک میں جاری کفایت شعاری مہم کے باعث احتیاطی اقدامات پر زور دیا جا رہا ہے۔ محسن نقوی نے مزید کہا کہ فرنچائز مالکان کی درخواست پر وزیراعظم  نے پی ایس ایل 11 کے فائنل کیلئے شائقین کو سٹیڈیم آنے کی خصوصی اجازت دی، انہوں  نے اس فیصلے پر وزیراعظم کا شکریہ بھی ادا کیا۔ واضح رہے کہ مشرق وسطیٰ میں کشیدگی اور ایران امریکا تنازع کے تناظر میں ممکنہ تیل بحران کے پیش نظر حکومتِ پاکستان نے ملک بھر میں کفایت شعاری مہم شروع کر رکھی ہے، جس کے تحت ایندھن کے استعمال میں کمی لانے کی کوششیں جاری ہیں۔