جنرل ہسپتال میں ادویات چوری، 4 ملازمین رنگے ہاتھوں گرفتار

04-05-2026

(لاہور جنرل) جنرل ہسپتال لاہور کی انتظامیہ نے بڑا ایکشن لیتے ہوئے سرکاری ادویات چوری کرتے ہوئے 4 ملازمین کو رنگے ہاتھوں گرفتار کر لیا، ڈی ایم ایس ڈاکٹر شاہد کی درخواست پر مقدمہ درج کر کے تفتیش کا آغاز کر دیا گیا ہے۔

پرنسپل پروفیسر فاروق افضل نے واضح کیا ہے کہ مریضوں کے حقوق پر ڈاکہ ڈالنے والوں کو کسی صورت رعایت نہیں دی جائے گی۔ ذرائع کا کہنا ہے کہ  گرفتار ملازمین کا ڈیوٹی روسٹر طلب کر لیا گیا ہے جبکہ تحقیقات کا دائرہ مزید وسیع کر دیا گیا ہے۔ ذرائع کے مطابق انتظامیہ نے پولیس سے میرٹ پر شفاف تفتیش کی درخواست کی ہے اور کہا ہے کہ اگر مزید افراد ملوث پائے گئے تو انہیں بھی قانون کا سامنا کرنا ہوگا۔ اس حوالے سے پروفیسر فریاد حسین نے بھی سخت کارروائی کا عندیہ دیا ہے۔ علاوہ ازیں پرنسپل پروفیسر فاروق افضل نے تمام ادویات کا مکمل آڈٹ کرانے کا حکم دے دیا ہے، جبکہ مقدمے کی مؤثر پیروی یقینی بنانے کیلئے ہسپتال انتظامیہ کو ذمہ داریاں سونپ دی گئی ہیں۔  ایم ایس کی جانب سے لیگل ایڈوائزر کو پولیس سے فوری رابطہ کرنے کا ٹاسک بھی دے دیا گیا ہے۔