ایل ڈی اے کا کریک ڈاؤن، غیرقانونی کمرشل عمارتوں کے خلاف 91 املاک سیل

04-02-2026

(لاہور نیوز) ڈی جی ایل ڈی اے طاہر فاروق کی ہدایت پر لاہور ڈویلپمنٹ اتھارٹی کا ٹاؤن پلاننگ ونگ غیرقانونی کمرشل عمارتوں کے خلاف متحرک ہو گیا۔

ایل ڈی اے ٹیموں  نے شادمان، گارڈن ٹاؤن، آرکیٹیکٹ سوسائٹی اور علامہ اقبال ٹاؤن میں آپریشن کرتے ہوئے مجموعی طور پر 91 املاک کو سربمہر کر دیا۔ تفصیلات کے مطابق غیرقانونی کمرشل استعمال اور کمرشل فیس کی عدم ادائیگی پر شادمان میں 12 املاک جبکہ شیر شاہ اور اورنگزیب بلاک نیو گارڈن ٹاؤن میں 14 املاک سیل کی گئیں، اسی طرح آرکیٹیکٹ سوسائٹی میں 41 املاک کو بھی غیرقانونی استعمال پر بند کر دیا گیا۔ سیل کی جانے والی املاک میں شادی ہال، مارکیز، نجی سکول، بیکریاں، فارمیسیز، کلینکس، گراسری سٹورز، ریسٹورنٹس، فوڈ پوائنٹس، پراپرٹی آفسز، بیوٹی سیلونز، کپڑوں کی دکانیں اور دیگر تجارتی دفاتر شامل ہیں۔ یہ آپریشن چیف ٹاؤن پلانر ون اسد الزمان اور چیف ٹاؤن پلانر ٹو اظہر علی کی نگرانی میں کیا گیا۔ ڈی جی ایل ڈی اے کا کہنا ہے کہ غیرقانونی کمرشل عمارتوں اور کمرشل فیس نادہندگان کے خلاف بلا امتیاز کارروائیاں جاری رہیں گی اور شہر میں قوانین کی عملداری ہر صورت یقینی بنائی جائے گی۔