اچھرہ پولیس کی بروقت کارروائیاں، 2 گمشدہ بچے بازیاب

03-27-2026

(لاہور نیوز) اچھرہ پولیس نے اغواء اور گمشدگی کی درخواستوں پر فوری کارروائی کرتے ہوئے دو کمسن بچوں کو بحفاظت تلاش کر کے والدین کے حوالے کر دیا۔

پولیس کے مطابق بچوں کے اغواء کی درخواستیں موصول ہونے پر ایس پی ماڈل ٹاؤن جہانداد اکرم کی ہدایت پر فوری طور پر خصوصی ٹیم تشکیل دی گئی، جس  نے مختلف علاقوں میں سرچ آپریشن کیا۔ ترجمان کے مطابق 4 سالہ حمزہ گھر سے کسی چیز کے لئے نکلا تھا کہ اس کے والد اسے اپنے ساتھ لے گئے، بتایا گیا ہے کہ بچے کے والدین کے درمیان کچھ عرصہ قبل علیحدگی ہو چکی تھی، پولیس نے بچے کو ریڑی والا چوک سے بازیاب کر لیا۔ دوسرے واقعے میں 5 سالہ احمد گھر سے کھیلنے نکلا اور واپسی کا راستہ بھول گیا، اچھرہ پولیس نے بچے کو فاضلیہ کالونی سے تلاش کر کے بحفاظت والدین کے حوالے کر دیا۔ ایس پی ماڈل ٹاؤن جہانداد اکرم کا کہنا ہے کہ جرائم کی روک تھام کے ساتھ ساتھ کمیونٹی پولیسنگ کو بھی فروغ دیا جا رہا ہے تاکہ شہریوں کو فوری ریلیف فراہم کیا جا سکے۔