یومِ پاکستان: پنجاب پولیس کا “محفوظ پنجاب، محفوظ پاکستان” کا عزم

03-23-2026

(لاہور نیوز) یومِ پاکستان کی 86ویں سالگرہ کے موقع پر پنجاب پولیس نے “محفوظ پنجاب، محفوظ پاکستان” کے عزم کا اعادہ کیا۔

انسپکٹر جنرل پنجاب پولیس عبدالکریم  نے تحریکِ آزادی کے قائدین اور جانثاروں کی عظیم قربانیوں کو خراجِ عقیدت پیش کرتے ہوئے کہا کہ یہ دن ہمیں اپنے قومی فرائض کی یاد دہانی کراتا ہے۔ آئی جی پنجاب عبدالکریم کا کہنا تھا کہ پنجاب پولیس یومِ پاکستان کے موقع پر ملک و قوم کی خدمت، شہریوں کے جان و مال کے تحفظ اور بلا امتیاز انصاف کی فراہمی کے عہد کی تجدید کرتی ہے، انہوں  نے اس بات پر زور دیا کہ پولیس فورس ہر قسم کے چیلنجز سے نمٹنے کیلئے تیار ہے۔ انہوں نے مزید کہا کہ یومِ پاکستان کے موقع پر دہشتگردوں، شرپسند عناصر اور جرائم پیشہ افراد کے خلاف بھرپور کارروائیوں کا عزم دہرایا جاتا ہے، افواجِ پاکستان، دیگر قانون نافذ کرنے والے اداروں، سکیورٹی ایجنسیز اور عوام کے تعاون سے دشمن کے ناپاک عزائم کو ناکام بنایا جائے گا۔ آئی جی پنجاب  نے اعلان کیا کہ لاہور سمیت صوبے بھر میں یومِ پاکستان کے سلسلے میں منعقد ہونے والی ریلیوں، تقریبات اور اجتماعات کو فول پروف سکیورٹی فراہم کی جائے گی تاکہ شہری پرامن ماحول میں قومی دن کی خوشیاں منا سکیں۔ انہوں  نے اس عزم کا اظہار کیا کہ تمام تر چیلنجز کے باوجود پنجاب پولیس اپنی پیشہ ورانہ صلاحیتوں کو بروئے کار لاتے ہوئے “محفوظ پنجاب، محفوظ پاکستان” کے ہدف کے حصول کو یقینی بنائے گی۔