پاکستانی اعلیٰ شخصیات نے ملنے والے 422 تحائف توشہ خانہ میں جمع کروا دیئے

03-19-2026

(لاہور نیوز) پاکستانی اعلیٰ شخصیات نے غیر ملکی دوروں کے دوران ملنے والے تحائف توشہ خانہ جمع کروا دیئے، یاد رہے کہ سال 2025 میں مہنگے ترین تحائف توشہ خانہ میں جمع کروائے گئے ہیں۔

صدر پاکستان آصف علی زرداری، وزیراعظم شہبازشریف، ڈپٹی وزیر اعظم اسحاق ڈار، چیئرمین سینیٹ یوسف رضا گیلانی، وزیر داخلہ سید محسن رضا نقوی، وزیر اطلاعات عطااللہ تارڑ، شزہ فاطمہ خواجہ، وزیراعلیٰ پنجاب مریم نوازشریف نے بھی تحفے توشہ خانہ میں جمع کروائے۔ فیلڈ مارشل جنرل سید عاصم منیر، ایئر چیف مارشل ظہیر احمد بابر سدھو، چیف آف نیول سٹاف ایڈمرل نوید اشرف، چیف آف جنرل سٹاف لیفٹیننٹ جنرل سید عامر رضا، چیئرمین نیب لیفٹیننٹ جنرل ریٹائرڈ نزید احمد کو ملنے والے تحفے بھی توشہ خانہ میں جمع کرا دیئے گئے۔ چیئرمین پاکستان پیپلز پارٹی بلاول بھٹو زرداری نے بھی تحفے نہیں رکھے، سپیکر پنجاب اسمبلی ملک احمد خان نے بھی تحفے توشہ خانہ میں جمع کروا دیئے۔ وہاب ریاض، رفعت مختار راجہ سمیت وفاقی سیکرٹریز، پروٹوکول افسران اور دیگر نے بھی تحفے توشہ خانہ میں جمع کروا دیئے۔ جو تحفے پاکستانی اعلیٰ شخصیات کو ملے ان میں مہنگی ترین گھڑیاں، قالین، چائے اور کافی سیٹ، تلواریں اور خنجر، مذہبی مقامات کے ماڈلز، پرفیوم، شالیں، آرائشی اشیاء، پینٹنگز، کتابیں، یادگاری شیلڈز شامل تھیں۔ سب سے زیادہ تحفے وزیراعظم شہبازشریف کو موصول ہوئے، حکام کیببنٹ ڈویژن کے مطابق تمام تحفے توشہ خانہ میں جمع ہو گئے، حکام کیبنٹ ڈویژن کے مطابق نئے قانون کے مطابق کوئی تحفہ اب خریدا نہیں جاسکتا، وہ جمع ہوتا ہے پھر اس کی نیلامی ہوتی ہے۔