عالمی کشیدگی کے باعث ادویات کی سپلائی متاثر ہونے کا خدشہ

03-11-2026

(ویب ڈیسک) عالمی کشیدگی کی صورتحال کے باعث ادویات کی سپلائی متاثر ہونے کا خدشہ پیدا ہو گیا۔

ادویات کی عالمی سپلائی میں ممکنہ تعطل کے پیش نظر ڈریپ نے ایڈوائزری جاری کر دی جس کے مطابق فارما کمپنیوں کو خام مال کے ایک ہی سپلائر پر انحصار کم کرنے کی ہدایت کی گئی ہے ، ڈریپ کا کہنا تھا کہ ادویات کے خام مال اور پیکنگ مواد کے متعدد ذرائع اختیار کئے جائیں۔ ایڈوائزری میں فارما کمپنیوں کو خام مال اور تیار ادویات کا مناسب سٹاک رکھنے ، شپنگ میں تاخیر یا دیگر غیر متوقع حالات سے نمٹنے کیلئے اضافی ذخیرہ رکھنے کی ہدایت کی گئی ہے ۔ کمپنیوں کو سپلائی کے ممکنہ خطرات کا باقاعدہ جائزہ لینے اور متبادل منصوبہ بندی کی بھی ہدایت کر دی گئی۔ ڈریپ کے مطابق مصنوعات کی نقل و حرکت کی مانیٹرنگ اور مستقبل کی طلب کا درست اندازہ لگایا جائے، ذخیرہ اندوزی، بلیک مارکیٹنگ اور مصنوعی قلت سے بچاؤ کیلئے موثر نگرانی ہو گی۔ ایڈوائزری میں سرکاری اداروں کو ترجیحی بنیادوں پر ادویات کی فراہمی جاری رکھنے ، وفاقی اور صوبائی حکومتوں کی ہدایات پر مکمل عملدرآمد یقینی بنانے کی ہدایت کی گئی ہے۔