ملاوٹ مافیا کے خلاف کارروائی، 31 ہزار لٹر چربی سے تیار آئل تلف

03-09-2026

(لاہور نیوز) پنجاب فوڈ اتھارٹی کی ٹیموں نے مانگا منڈی کے علاقے میں ایک خفیہ یونٹ پر چھاپہ مار کر بڑی کارروائی کی۔

ڈی جی فوڈ اتھارٹی عاصم جاوید نے ٹیموں کے ہمراہ کارروائی کرتے ہوئے 31 ہزار لٹر چربی سے تیار آئل اور 2500 کلو چربی و آلائشیں تلف کر دیں جبکہ 11 کڑاہے بھی ضبط کر لئے گئے۔ ترجمان کے مطابق ملزم رہائشی علاقے میں چھپ کر جانوروں کی چربی اور آلائشوں سے آئل تیار کر رہے تھے، یونٹ کے پاس نہ لائسنس موجود تھا اور نہ ہی آئل کا ریکارڈ رکھا گیا تھا، جعلسازی کے اس مکروہ دھندے پر ملزم کے خلاف تھانہ رائیونڈ میں مقدمہ درج کروا دیا گیا۔ ڈی جی فوڈ اتھارٹی کے مطابق آلائشوں سے تیار ہونے والا آئل صرف بائیو ڈیزل بنانے کیلئے استعمال کیا جا سکتا ہے جبکہ اس سے کوکنگ آئل تیار کرنا سنگین جرم ہے، ویجیلنس ٹیموں کو تیار آئل کی سپلائی چین کی تحقیقات کا ٹاسک بھی سونپ دیا گیا ہے۔ انہوں  نے واضح کیا کہ عوام کی صحت سے کھیلنے والوں کے خلاف سخت کارروائیاں جاری رہیں گی اور شہری ملاوٹ مافیا کے خلاف اطلاع دینے کیلئے فوڈ اتھارٹی ہیلپ لائن 1223 پر رابطہ کریں۔