رحمان اللہ کی دستبرداری کے بعد فرنچائز پشاور زلمی کا مؤقف سامنے آ گیا

02-08-2026

(لاہور نیوز) پاکستان سپر لیگ (پی ایس ایل) فرنچائز پشاور زلمی نے افغانستان کے بیٹر رحمان اللّٰہ گرباز کی لیگ میں ڈائریکٹ سائننگ پر وضاحت جاری کردی۔

پشاور زلمی کی جانب سے جاری بیان میں کہا گیا کہ افغانستان کے کرکٹر رحمان اللّٰہ گرباز کی حالیہ ڈائریکٹ سائننگ اس وقت کی گئی جب انہیں پاکستان کرکٹ بورڈ (پی سی بی) اور افغانستان کرکٹ بورڈ (اے سی بی) دونوں کی جانب سے مکمل عدم اعتراض سرٹیفکیٹ (این او سی) موصول ہوچکا تھا۔ فرنچائز کا بیان میں کہنا تھا کہ رحمان اللّٰہ گربار سائننگ کے وقت فراہم کردہ آفیشل لسٹ میں دستیاب بہترین آپشنز میں شامل تھے اور ان کی سائننگ مکمل طور پر مقررہ طریقہ کار کے مطابق کی گئی۔ دوسری جانب فرنچائز نے واضح کیا کہ یہ فیصلہ خالصتاً پیشہ ورانہ اور کرکٹ بنیادوں پر کیا گیا، جو پاکستان سپر لیگ کے قواعد، پی سی بی کی ہدایات اور لیگ کے طے شدہ فریم ورک کے عین مطابق ہے۔