ویلنشیا ٹاؤن: پتنگ ڈور سے 10 سالہ بچہ زخمی، ڈی آئی جی آپریشنز کا سخت نوٹس

01-31-2026

(لاہور نیوز) ویلنشیا ٹاؤن میں پتنگ کی ڈور پھرنے سے 10 سالہ بچہ زخمی ہو گیا۔

واقعہ گزشتہ شام تقریباً 5 بجے پیش آیا، جہاں مصطفیٰ آفندی نامی بچے کے گلے پر پتنگ کی ڈور سے کٹ لگ گیا۔ زخمی بچے کو فوری طور پر قریبی ہسپتال منتقل کیا گیا، جہاں طبی امداد کے بعد اس کی حالت خطرے سے باہر قرار دی گئی اور شام کو ہی ڈسچارج کر دیا گیا۔ واقعہ کا ڈی آئی جی آپریشنز فیصل کامران نے سخت نوٹس لیتے ہوئے سیف سٹی کیمروں کی مدد سے ذمہ دار پتنگ بازوں کی نشاندہی کرنے کا حکم دے دیا ہے۔ ڈی آئی جی آپریشنز نے واضح ہدایات جاری کی ہیں کہ ملوث افراد کو قانون کے کٹہرے میں لایا جائے گا۔ فیصل کامران نے شہر بھر میں غیر قانونی پتنگ بازی کے خلاف کریک ڈاؤن مزید تیز کرنے کی ہدایت کرتے ہوئے کہا کہ مقررہ تاریخوں کے علاوہ پتنگ بازی مکمل طور پر ممنوع ہے اور صرف سرکاری اجازت یافتہ دنوں میں ہی پتنگ بازی کی اجازت ہو گی۔ ڈی آئی جی آپریشنز کے مطابق پتنگ بازی ایکٹ کی خلاف ورزی جان لیوا جرم ہے اور اس پر زیرو ٹالرنس پالیسی اپنائی جا رہی ہے۔ انہوں نے خبردار کیا کہ پابندی پر عملدرآمد نہ کروانے والے افسران بھی جوابدہ ہوں گے۔