زائد المیعاد شناختی دستاویزات پر سی ایس ایس 2026 امتحان میں داخلہ ممنوع

01-31-2026

(لاہور نیوز) فیڈرل پبلک سروس کمیشن (ایف پی ایس سی) نے 4 فروری سے شروع ہونے والے سی ایس ایس 2026 کے تحریری امتحانات کے سلسلے میں رجسٹرڈ امیدواروں کیلئے اضافی ہدایات جاری کر دیں۔

ایف پی ایس سی کے مطابق امیدواروں کو ہدایت کی گئی ہے کہ وہ قومی شناختی کارڈ یا پاسپورٹ کی میعاد ختم ہونے سے قبل لازماً تجدید کرائیں، کیونکہ زائد المیعاد شناختی دستاویزات پر امتحانی ہال میں داخلے کی اجازت نہیں دی جائے گی۔ کمیشن  نے مزید کہا ہے کہ تمام امیدوار امتحان کے آغاز سے کم از کم 50 منٹ قبل اپنی مقررہ نشستوں پر موجود ہوں، امتحانی ہال میں کسی بھی قسم کا اضافی مواد لے جانے کی قطعی اجازت نہیں ہو گی۔ ایف پی ایس سی  نے امیدواروں پر زور دیا ہے کہ وہ پہلے سے جاری کردہ ہدایات کے ساتھ ساتھ نئی اضافی ہدایات پر بھی مکمل عمل درآمد یقینی بنائیں۔