بھاٹی چوک مین ہول واقعہ: غلط معلومات دینے والے افسران کے نام سامنے آ گئے

01-30-2026

(لاہور نیوز) بھاٹی چوک مین ہول میں ماں بچی گرنے کے معاملہ پرحکومت اور میڈیا کو غلط معلومات فراہم کرنے والے کونسے افسران؟ متعلقہ افراد کے نام سامنے آگئے۔

ایم ڈی واسا غفران احمد اور ڈسٹرکٹ آفیسرریسکیو 1122 شاہد وحید نے غلط معلومات فراہم کیں، ماں بچی کو نکالنا ریسکیو 1122 جبکہ ذمہ داری واسا حکام کی بھی تھی۔ ایم ڈی واسا غفران احمد نے بتایا تھا کہ واٹر لیول ایک فٹ ہے، اتنے پانی میں ڈوبنا سوال ہی پیدا نہیں ہو سکتا، ایم ڈی واسا نے کہا کہ واسا لائن سے ٹائر بھی گزارا گیا مگر کچھ نہ ملا۔ اُنہوں کا اپنے بیان میں کہنا تھا کہ کہ ایسی کوئی صورتحال نظر نہیں آئی کہ درمیان میں کوئی بھی رکاوٹ ہو ،واٹر لیول ایک فٹ ہے، ایسا لگتا نہیں کہ یہاں پر کوئی گرا ہو، اِس بات کی سوچ موجود ہے کہ شاید یہ فیک کال ہے۔ دوسری جانب ریسکیو 1122کے اہلکار شاہد وحید نے بھی افسران کو آگاہ کیا ،شاہد وحید نے ویڈیو بناکر بھیجی کہ یہاں پر کوئی گر نہیں سکتا، پانی بھی کم ہے، باڈی آگے جاہی نہیں سکتی، ایسا کوئی واقعہ ہوا ہی نہیں۔ صوبائی وزیر اطلاعات عظمیٰ بخاری کا کہنا تھ اکہ تحقیق اور مکمل سرچنگ کئے بغیر ہمیں بتایا گیا کہ ایسا واقعہ ہی نہیں ہوا، جو خبر مجھے بھیجی گئی وہ میں نے آگے دیدی،جو لوگ وہاں موجود تھے وہی اطلاع و معلومات اعلی افسران اور ہمیں پہنچا رہے تھے ۔ اُنہوں نے کہا کہ یہ افسران خود میڈیا کو بتا رہے تھے اس وقت یقین کرنے کے علاوہ اور کیا آپشن ہوسکتا ہے، آپ سوچ بھی نہیں سکتے کہ اتنی غیر ذمہ داری کا مظاہرہ کیا جائے گا۔