رمضان المبارک کی آمد سے قبل سہولت بازار فنکشنل ہو جائیں گے، سلمیٰ بٹ

01-30-2026

(لاہور نیوز) معاون خصوصی برائے فوڈ سیفٹی اینڈ کنزیومر پروٹیکشن سلمیٰ بٹ نے کہا کہ رمضان المبارک کی آمد سے قبل سہولت بازار فنکشنل ہو جائیں گے۔

فوڈ سیفٹی اینڈ کنزیومر پروٹیکشن ڈیپارٹمنٹ میں رمضان نگہبان پیکج کے حوالے سے ایک اہم اجلاس منعقد ہوا، جس کی صدارت معاون خصوصی برائے فوڈ سیفٹی اینڈ کنزیومر پروٹیکشن سلمیٰ بٹ نے کی۔ اجلاس میں چیئرمین سہولت بازار اتھارٹی ملک افضل کھوکھر، چیئرمین پنجاب ایگریکلچر مارکیٹنگ ریگولیٹری اتھارٹی ملک احمد سعید، سیکرٹری فوڈ سیفٹی ڈاکٹر کرن خورشید، ڈی جی فوڈ اتھارٹی عاصم جاوید، ڈی جی فوڈ امجد حفیظ، ڈی جی کموڈٹیز عمران قریشی، ڈی جی پیمرا طارق علی بسرا سمیت دیگر اعلیٰ افسران  نے شرکت کی۔ اجلاس میں بریفنگ دیتے ہوئے سلمیٰ بٹ نے بتایا کہ رمضان المبارک کی آمد سے قبل 15 فروری تک پنجاب بھر کے تمام رمضان، ماڈل اور سہولت بازار مکمل طور پر فنکشنل ہو جائیں گے، رمضان بازاروں کے اوقات کار صبح 9 بجے سے شام 5 بجے تک ہوں گے۔ انہوں نے کہا کہ رمضان المبارک کے دوران ماڈل، سہولت اور رمضان بازاروں میں 10 کلو آٹے کا تھیلا 850 روپے میں دستیاب ہو گا، آٹے کی سپلائی بہتر بنانے کیلئے ہر فلور مل اپنے متعلقہ ضلع میں 3 سیل پوائنٹس قائم کرے گی جہاں سبسڈائز آٹا فراہم کیا جائے گا۔ سلمیٰ بٹ کے مطابق رمضان نگہبان پیکج کے تحت چکن 15 روپے فی کلو جبکہ انڈے 10 روپے فی درجن سستے داموں دستیاب ہوں گے، اس کے علاوہ رمضان کے دوران پنجاب کی 152 تحصیلوں میں 1216 مریم کا دسترخوان قائم کئے جائیں گے، جہاں روزانہ 250 افراد کو پورا رمضان معیاری کھانا فراہم کیا جائے گا۔ انہوں  نے مزید بتایا کہ مریم کا دسترخوان پر فراہم کئے جانے والے کھانے کے معیار کی جانچ پنجاب فوڈ اتھارٹی روزانہ کی بنیاد پر کرے گی اور تمام دسترخوانوں پر کھانے کا معیار اور پیکج یکساں ہو گا۔ سلمیٰ بٹ نے کہا کہ لاہور  کے 105 بڑے سٹورز پر اشیائے خورونوش ہول سیل ریٹ پر دستیاب ہوں گی جبکہ پنجاب فوڈ اتھارٹی کے نمائندے تمام رمضان، ماڈل اور سہولت بازاروں میں اشیائے ضروریہ کی کوالٹی مانیٹر کرنے کیلئے تین شفٹوں میں فرائض سرانجام دیں گے۔ انہوں نے بتایا کہ پنجاب کے تمام اضلاع کی انتظامیہ رمضان سے قبل اپنا ہوم ورک مکمل کر چکی ہے جبکہ پنجاب کی تمام منڈیوں میں کنسٹرکشن ورک اور مین ہولز کی جیو ٹیگنگ بھی کی جائے گی۔