نِپاہ وائرس کا خدشہ، مختلف اداروں کو الرٹ جاری

01-30-2026

(ویب ڈیسک) بارڈر ہیلتھ سروسز نے نِپاہ وائرس کے ممکنہ خطرے کے پیش نظر مختلف اداروں کو الرٹ جاری کر دیا۔

حکام کے مطابق پاکستان میں نِپاہ وائرس کا خطرہ کم ہے اور جاری اقدامات صرف احتیاطی نوعیت کے ہیں۔ بارڈر ہیلتھ سروسز  نے ہسپتالوں کو ہدایت کی ہے کہ مشتبہ نِپاہ مریضوں کیلئے بیڈز مختص کئے جائیں اور پمز ہسپتال اسلام آباد ایئرپورٹ سے آنے والے مشتبہ کیسز کیلئے تیار رہے، ہوائی، بحری اور زمینی داخلی راستوں پر سکریننگ اور نگرانی مزید سخت کر دی گئی ہے اور ایئرپورٹس و بارڈر پوائنٹس پر فوکل پرسنز نامزد کرنے کی ہدایت دی گئی ہے۔ مزید برآں، تمام صوبائی حکومتوں کو تربیت یافتہ عملہ فراہم کرنے اور ریفرل سسٹم کو یقینی بنانے کی ہدایت کی گئی ہے، ڈی ایچ او اسلام آباد کو مشتبہ نِپاہ مریضوں کیلئے خصوصی ایمبولینس مختص کرنے اور مریضوں کے قریبی رابطوں کی 21 دن تک نگرانی کرنے کی ہدایت بھی دی گئی ہے۔ حکام  نے عوام سے اپیل کی ہے کہ وہ غیر ضروری خوف نہ پھیلائیں اور صحت کے اداروں کی ہدایات پر عمل کریں۔