فوڈ اتھارٹی کی کارروائی، ناقص آئل سے نمکو تیار کرنے والا یونٹ بند

01-30-2026

(لاہور نیوز) پنجاب فوڈ اتھارٹی نے ناقص اور استعمال شدہ آئل سے نمکو تیار کرنے والے ایک یونٹ کو بند کر دیا۔

ڈی جی فوڈ اتھارٹی عاصم جاوید کی ہدایات پر فوڈ سیفٹی ٹیموں  نے نشتر ٹاؤن میں کارروائی کرتے ہوئے یونٹ میں استعمال شدہ آئل، ممنوعہ رنگ اور کھلے مصالحے تلف کر دیئے۔ عاصم جاوید  نے بتایا کہ یونٹ میں صفائی کے انتہائی ناقص انتظامات تھے، دیواریں جالی لگی اور بدبودار ماحول میں نمکو تیار اور پیک کیا جا رہا تھا، یونٹ پہلے سے بند تھا لیکن قوانین کی خلاف ورزی کرتے ہوئے خود سے دوبارہ کھول کر کام کیا جا رہا تھا، جس پر کارروائی عمل میں لائی گئی۔ انہوں نے مزید کہا کہ نمکو ٹوٹے گندے فرش پر تیار اور پیک کیا جا رہا تھا، نان فوڈ گریڈ برش استعمال ہو رہا تھا اور ملازمین نے انگھوٹیاں پہن رکھی تھیں، فوڈ ہینڈلرز کے میڈیکل اور ٹریننگ سرٹیفکیٹس بھی موجود نہیں تھے۔ ڈی جی فوڈ اتھارٹی نے سخت الفاظ میں کہا کہ بچوں کیلئے سنیکس تیار کرنے میں قوانین کی خلاف ورزی ناقابل قبول ہے اور اس پر سخت ایکشن لیا جائے گا، شہری خوراک کے حوالے سے کسی بھی شکایت کی صورت میں 1223 پر اطلاع دے سکتے ہیں۔ انہوں  نے واضح کیا کہ وزیراعلٰی کے ویژن کے مطابق جعلساز مافیا کو کوئی رعایت نہیں دی جائے گی اور خوراک کی تیاری سے ترسیل تک چیکنگ کی جا رہی ہے، کاروباری حضرات خوراک کے حوالے سے مکمل ہدایات پنجاب فوڈ اتھارٹی کی ویب سائٹ سے حاصل کر سکتے ہیں۔