صوبائی وزیر مواصلات کی شاہراہوں کے رائٹ آف وے سے تجاوزات کے خاتمے کی ہدایت

01-29-2026

(لاہور نیوز) صوبائی وزیر مواصلات ملک صہیب احمد بھرتھ نے شاہراہوں کے رائٹ آف وے پر موجود تجاوزات کے خاتمے کیلئے محکمہ ہائی وے کو ہدایات جاری کر دی ہیں۔

ملک صہیب احمد بھرتھ نے کہا کہ ناجائز اور غیر قانونی طور پر قائم سٹرکچر کو مسمار کیا جائے اور جن شاہراہوں پر تعمیراتی کام جاری ہے، ان کو ترجیح دی جائے۔ انہوں نے واضح کیا کہ شاہراہوں کے رائٹ آف وے پر کسی کو تجاوز کرنے کی اجازت نہیں دی جائے گی۔ صوبائی وزیر مواصلات کی ہدایت پر محکمہ ہائی وے نے فوری طور پر آپریشن شروع کر دیا، لاہور میں بیدیاں روڈ اور ملتان وہاڑی منصوبے کے رائٹ آف وے پر موجود تجاوزات کو ہٹا کر مسمار کیا گیا۔ ملک صہیب احمد بھرتھ  نے کہا کہ صوبہ بھر کی عوام کو بہترین سفری سہولیات فراہم کرنے کیلئے تمام اقدامات کئے جا رہے ہیں اور شاہراہوں کے رائٹ آف وے کی حفاظت یقینی بنائی جائے گی۔