گورنر پنجاب سردار سلیم حیدر سے چینی قونصل کی الوداعی ملاقات، خدمات کو سراہا

01-29-2026

(لاہور نیوز) گورنر پنجاب سردار سلیم حیدر سے چینی قونصل جنرل ژاؤ شریں نے گورنر ہاؤس لاہور میں الوداعی ملاقات کی، گورنر پنجاب نے سبکدوش ہونے والے چینی قونصل جنرل کی پاک چین تعلقات کے فروغ کے لیے خدمات کو سراہا۔

گورنر پنجاب نے کہا کہ پاک چین دوستی کوہِ ہمالیہ سے بھی بلند ہے اور دونوں ممالک نے ہر مشکل وقت میں ایک دوسرے کا بھرپور ساتھ دیا ہے۔ انہوں نے کہا کہ پاکستان اور بالخصوص صوبہ پنجاب کے عوام چین سے بے پناہ محبت کرتے ہیں اور پاک چین دوستی پاکستان کی خارجہ پالیسی کا ایک مضبوط ستون ہے، جس میں پاکستان پیپلز پارٹی نے ہمیشہ اہم کردار ادا کیا ہے۔ سردار سلیم حیدر نے کہا کہ 2008 سے 2013 کے دوران صدر آصف علی زرداری نے پاک چین تعلقات کو نئی بلندیوں تک پہنچایا اور اس دوران چین کے 14 سرکاری دورے کیے۔ انہوں نے کہا کہ چین پاکستان اقتصادی راہداری (سی پیک) پاکستان کی ترقی اور خوشحالی کا گیم چینجر منصوبہ ہے، جس میں مزید جدت لا کر اسے آگے بڑھایا جائے گا۔ گورنر پنجاب نے اٹک جیسے دور دراز علاقے میں چینی قونصل جنرل کے تعاون سے ڈسپنسری کے قیام کو سراہتے ہوئے کہا کہ چین اور ریڈ کریسنٹ کے اشتراک سے غریب عوام کے لیے قائم کی جانے والی یہ ڈسپنسری آخری مراحل میں ہے، جس کا جلد افتتاح کیا جائے گا۔ اس موقع پر چینی قونصل جنرل ژاؤ شریں نے کہا کہ وہ پاکستان اور پنجاب کے عوام کے شکر گزار ہیں اور یہاں سے بے شمار خوبصورت یادیں لے کر جا رہے ہیں۔ انہوں نے کہا کہ پاکستان اور چین کے عوام اخوت اور محبت کے مضبوط رشتے میں بندھے ہیں اور مستقبل میں بھی پاک چین تعاون ہر سطح پر جاری رہے گا۔