برائلر کے نرخوں میں 7 روپے کا اضافہ، قیمت 533 روپے کلو مقرر

01-29-2026

(لاہور نیوز) پولٹری مصنوعات کی قیمتیں شدید اتار چڑھاؤ کا شکار ہیں۔

سرکاری نرخ نامے کے مطابق برائلر گوشت کی قیمت میں 7 روپے فی کلو اضافہ کر دیا گیا ہے، جس کے بعد برائلر گوشت کی نئی قیمت 533 روپے فی کلو مقرر کر دی گئی، تاہم شہریوں کو صافی گوشت 580 روپے فی کلو تک فروخت کیا جا رہا ہے، جو مقررہ نرخوں سے کہیں زیادہ ہے۔ زندہ برائلر کے نرخوں میں بھی اضافہ دیکھنے میں آیا ہے، فارم گیٹ ریٹ زندہ برائلر 340 روپے فی کلو مقرر کیا گیا ہے، جبکہ ہول سیل مارکیٹ میں زندہ برائلر 354 روپے فی کلو میں فروخت ہو رہا ہے، پرچون بازاروں میں زندہ برائلر کی قیمت 368 روپے فی کلو تک پہنچ گئی ہے۔ ذرائع کے مطابق گزشتہ دو دنوں کے دوران برائلر گوشت کی قیمت میں مجموعی طور پر 29 روپے فی کلو تک اضافہ کیا گیا ہے، جس سے شہریوں میں تشویش کی لہر دوڑ گئی ہے۔ دوسری جانب انڈوں کی قیمتوں میں کوئی کمی دیکھنے میں نہیں آئی، انڈوں کی قیمت 337 روپے فی درجن برقرار ہے، تاہم مارکیٹ میں انڈے مہنگے داموں فروخت کئے جا رہے ہیں، ہول سیل مارکیٹ میں انڈوں کی ایک پیٹی کی قیمت 9 ہزار 990 روپے مقرر کی گئی ہے۔