برائلر کے نرخوں میں 22 روپے اضافہ، قیمت 526 روپے کلو مقرر

01-28-2026

(لاہور نیوز) پولٹری مصنوعات کی قیمتیں ایک بار پھر اتار چڑھاؤ کا شکار ہو گئی ہیں، جہاں برائلر کے نرخوں میں نمایاں اضافہ ریکارڈ کیا گیا۔

سرکاری نرخ نامے کے مطابق برائلر گوشت کی قیمت میں 22 روپے فی کلو اضافہ کیا گیا ہے، جس کے بعد برائلر گوشت کی قیمت 526 روپے فی کلو مقرر کر دی گئی ہے، تاہم پرچون بازاروں میں صافی گوشت شہریوں کو 580 روپے فی کلو تک فروخت کیا جا رہا ہے، جس پر صارفین  نے تشویش کا اظہار کیا ہے۔ دوسری جانب زندہ برائلر کے نرخوں میں بھی 15 روپے فی کلو اضافہ ہوا ہے، فارم گیٹ پر زندہ برائلر کی قیمت 335 روپے فی کلو مقرر کی گئی ہے، جبکہ ہول سیل مارکیٹ میں زندہ برائلر 349 روپے فی کلو میں دستیاب ہے، پرچون بازار میں زندہ برائلر کی قیمت 363 روپے فی کلو تک جا پہنچی ہے۔ ادھر انڈوں کی قیمتوں میں کسی قسم کی کمی دیکھنے میں نہیں آئی، انڈے 337 روپے فی درجن کی قیمت پر برقرار ہیں، جبکہ شہریوں کا کہنا ہے کہ مارکیٹ میں انڈے سرکاری نرخوں سے زائد قیمت پر فروخت کئے جا رہے ہیں، ہول سیل مارکیٹ میں انڈوں کی ایک پیٹی 9 ہزار 990 روپے میں فروخت ہو رہی ہے۔ شہریوں نے مطالبہ کیا ہے کہ انتظامیہ قیمتوں پر مؤثر کنٹرول کو یقینی بنائے، جبکہ متعلقہ حکام کا کہنا ہے کہ نرخوں پر نظر رکھی جا رہی ہے اور خلاف ورزی کرنے والوں کے خلاف کارروائی عمل میں لائی جائے گی۔