پنجاب ہائر ایجوکیشن کمیشن (ترمیمی) بل 2025 منظور

01-27-2026

(لاہور نیوز) پنجاب اسمبلی میں دی پنجاب ہائر ایجوکیشن کمیشن (ترمیمی) بل 2025 منظور کر لیا گیا۔

بل کے تحت چیئرمین پی ایچ ای سی کی عمر کی حد 65 سال تک کرنے کی ترمیم منظور کرلی اور پنجاب ہائر ایجوکیشن کمیشن ایکٹ 2014 میں ترمیم کی جائے گی، ترمیمی بل حکومتی رکن اسمبلی امجد علی جاوید نے پیش کیا تھا۔ امجد علی جاوید کا کہنا تھا چیئرمین پی ایچ ای سی کی عمر کے حوالے سے پہلے حد عمر موجود نہیں تھی، کوئی سو سال تک چیئرمین رہنا چاہے تو رہ سکتا ہے، اس وقت چیئرمین پی ایچ ای سی کی عمر 75 سال ہے، قدرت کا ایک نظام ہے وقت کے ساتھ ساتھ انسان کے اعضا کام کرنا چھوڑ دیتے ہیں۔ اُنہوں نے کہا کہ عمر کی قدغن لگائی جانی چاہیے کیوں کہ چیئرمین نے سارے سسٹم کو دیکھ کر فیصلے لینے ہوتے ہیں، کچھ لوگ اپنے آپ کو ناگزیر سمجھتے ہیں جبکہ قبرستاں ناگزیر لوگوں سے بھرے پڑے ہیں، سسٹم چلتا رہتا ہے۔ حکومتی رکن اسمبلی جس نے اتنے بڑے نظام کو چلانا ہے تو اس کے لیے عمر کی حد مقرر ہونی چاہیے، بڑے بڑے ٹیلنٹڈ جوان بھرے پڑے، ان کو موقع ملنا چاہیے، پی ایچ ای سی کا چیئرمین 65 سال سے اوپر نہیں ہونا چاہیے۔ بل پنجاب اسمبلی میں متفقہ رائے سے منظور ہوگیا، جب کہ حتمی منظوری گورنر پنجاب دیں گے۔