اے ٹی سی ججز کی سکیورٹی کیلئے نئی بلٹ پروف گاڑیاں خریدنے کا فیصلہ

01-27-2026

لاہور: (محمد اشفاق) پنجاب پولیس نے انسداد دہشت گردی عدالتوں (اے ٹی سی) کے ججز کی سکیورٹی کو مزید مؤثر بنانے کیلئے 11 نئی بلٹ پروف گاڑیاں خریدنے کا فیصلہ کر لیا ہے۔

ذرائع کے مطابق انسپکٹر جنرل پولیس پنجاب نے وزیر اعلیٰ پنجاب کو گاڑیوں کی خریداری کیلئے 23 کروڑ 86 لاکھ 45 ہزار روپے کی سمری ارسال کر دی ہے۔ مراسلے میں بتایا گیا ہے کہ ڈپٹی انسپکٹر جنرل پولیس سکیورٹی ڈویژن لاہور جوڈیشری کی سکیورٹی کے فوکل پرسن ہیں، جبکہ ملک کے عدالتی نظام کو سکیورٹی تھریٹس لاحق ہیں، سکیورٹی تھریٹس سے متعلق مراسلہ بھی سمری کے ساتھ منسلک کیا گیا ہے۔ دستاویزات کے مطابق اے ٹی سی ججز کی سکیورٹی کیلئے 11 نئی گاڑیاں خریدنے پر 14 کروڑ 18 لاکھ 45 ہزار روپے درکار ہوں گے، جبکہ ایک گاڑی کی قیمت 1 کروڑ 28 لاکھ 95 ہزار روپے بتائی گئی ہے۔ اس کے علاوہ گاڑیوں کو بلٹ پروف بنانے کیلئے مزید 9 کروڑ 68 لاکھ روپے درکار ہوں گے، جبکہ ایک گاڑی کو بلٹ پروف بنانے پر 88 لاکھ روپے لاگت آئے گی۔ مراسلے میں نئی گاڑیوں کی خریداری کیلئے سپلیمنٹری گرانٹ فراہم کرنے کی بھی درخواست کی گئی ہے۔