پہلی سے پانچویں جماعت تک سلیبس برقرار، تبدیلی پر مشاورت جاری

01-27-2026

(ویب ڈیسک) وفاقی حکومت اور صوبوں کے درمیان پہلی سے پانچویں جماعت تک نصاب میں ممکنہ تبدیلی کے حوالے سے مشاورت کا عمل جاری ہے۔

حکام کے مطابق آئندہ تعلیمی سال میں نصاب میں کوئی تبدیلی نہیں کی جائے گی، جبکہ سلیبس میں تبدیلی کا اطلاق تعلیمی سال 2027-28 سے متوقع ہے۔ ذرائع کے مطابق وفاقی حکومت نے صوبوں کو پانچویں جماعت تک موجودہ سلیبس کی طباعت جاری رکھنے کی پیشکش بھی کی ہے تاکہ طلبہ اور تعلیمی اداروں کو کسی فوری مشکل کا سامنا نہ کرنا پڑے، بعض صوبے وفاقی سطح پر تیار کردہ سلیبس میں جزوی ترامیم کے ساتھ اسے اپنانے کے خواہاں ہیں۔ دوسری جانب برٹش کونسل کے سلیبس پر بھی مشاورت جاری ہے، جس میں صوبے اپنی ضروریات کے مطابق چند تبدیلیاں کر کے نصاب اپنانے پر غور کر رہے ہیں۔ تعلیمی ماہرین کے مطابق نصاب میں کسی بھی قسم کی تبدیلی سے قبل تمام صوبوں اور سٹیک ہولڈرز سے مشاورت کو یقینی بنانا ناگزیر ہے تاکہ یکساں اور معیاری تعلیمی نظام کو فروغ دیا جا سکے۔