رنگ روڈ کے ٹول پلازوں کی بیوٹیفکیشن، اسٹیٹ آف دی آرٹ بنانے کی ہدایت

01-27-2026

(لاہور نیوز) رنگ روڈ پر موجود تمام ٹول پلازوں کی بیوٹیفکیشن اور ان کو اسٹیٹ آف دی آرٹ بنانے کی ہدایت کر دی گئی۔

صوبائی وزیر مواصلات ملک صہیب احمد بھرتھ کی زیر صدارت ایک اہم اجلاس منعقد ہوا جس میں رنگ روڈ کی بیوٹیفکیشن، اسفالٹ ورک، اسٹریٹ لائٹس کی تنصیب، دیواروں پر پینٹ ورک، ٹول پلازوں کی بحالی اور پینٹ آرٹ ورک سے متعلق امور کا تفصیلی جائزہ لیا گیا۔ اجلاس میں سیکرٹری سی اینڈ ڈبلیو سہیل اشرف، ایڈیشنل سیکرٹری، رنگ روڈ اتھارٹی، ایف ڈبلیو او اور دیگر متعلقہ اداروں کے افسران  نے شرکت کی، اجلاس کے دوران صوبائی وزیر کو رنگ روڈ کی بیوٹیفکیشن کے حوالے سے اب تک کی پیش رفت پر تفصیلی بریفنگ دی گئی۔ صوبائی وزیر مواصلات ملک صہیب احمد بھرتھ نے ہدایت کی کہ رنگ روڈ پر موجود تمام ٹول پلازوں کی بیوٹیفکیشن کی جائے اور انہیں اسٹیٹ آف دی آرٹ بنایا جائے، سروس روڈ پر موجود ویلجز کی بیرونی دیواروں پر کیا گیا پینٹ ورک قابلِ ستائش ہے۔ ملک صہیب احمد بھرتھ کا کہنا تھا کہ ٹول پلازوں کے نزدیک روڈ پر پینٹ آرٹ ورک سے رنگ روڈ کی خوبصورتی میں مزید اضافہ ہو گا، خراب پورشنز پر اسفالٹ ورک تیزی سے جاری ہے جبکہ خوبصورت اور دلکش پودے لگانے کا عمل بھی جاری رکھا گیا ہے۔ صوبائی وزیر  نے کہا کہ رنگ روڈ کو ایک ماڈل روڈ بنانے کی جانب تیزی سے پیش رفت کی جا رہی ہے اور رنگ روڈ کی بیوٹیفکیشن میں ہر روز بہتری آ رہی ہے۔