وزیراعلیٰ پنجاب نے ہر ضلع میں سٹروک مینجمنٹ سنٹر قائم کرنے کی منظوری دیدی

01-27-2026

(لاہور نیوز) وزیراعلیٰ پنجاب مریم نواز شریف نے ہر ضلع میں سٹروک مینجمنٹ سنٹر قائم کرنے کی منظوری دے دی۔

صوبے کے ہر ڈی ایچ کیو میں نیورالوجسٹ اورپیڈزنیورالوجسٹ تعینات کرنے کا اصولی فیصلہ کیا گیا ہے۔وزیراعلیٰ کی ہدایت پر ہر ضلع میں ایک ڈاکٹر اورنرس کو فوری طورپر تین ما ہ کی سٹروک مینجمنٹ ٹریننگ کرائی جائے گی۔ وزیراعلیٰ مریم نوازنے فوری طورپر سٹروک پیشنٹ کیلئے ٹیلی میڈسن پراجیکٹ شروع کرنے کا حکم بھی دیا۔ ضلعی ہسپتالوں کے ڈاکٹرفالج کے مریض کے فوری علاج کیلئے سپیشلسٹ اورکنسلٹنٹ سے ٹیلی فونک رابطہ کرسکیں گے۔ وزیراعلیٰ مریم نواز شریف نے سٹروک مینجمنٹ سنٹر کیلئے نرسز ٹریننگ پروگرام شروع کرنے اور ریسکیورز سٹروک مینجمنٹ ٹریننگ کرانے کیلئے اقدامات کی ہدایت جاری کی ہے۔انہوں نے فالج کے علاج کیلئے عوامی آگاہی مہم شروع کرنے کا حکم دیا۔ انہوں نے کہا ہے کہ فالج کے علاج کیلئے گولڈن آورز کی اہمیت مسلمہ ہے،آگاہی مہم خود لیڈ کروں گی، پنجاب کے ہر چلڈرن ہسپتال میں سٹروک مینجمنٹ سنٹر بنائیں گے،چاہتے ہیں کہ کسی مریض کو علاج کیلئے بڑے شہر نہ جانا پڑے۔ پمز کے نیورالوجسٹ ڈاکٹر قاسم بشیر نے وزیراعلیٰ کو سٹروک مینجمنٹ پروگرام پر بریفنگ دی۔ بریفنگ کے مطابق 25 سال سے زائد العمر4 میں سے ایک شخص کو فالج کا خطرہ ہوتا ہے، فالج کے پری ہاسپٹل،ہاسپٹل اورپوسٹ ہاسپٹل کیئر کیلئے آگاہی اور ٹریننگ لازمی ہے۔