شہری مری کے سفر سے اجتناب کریں، عظمیٰ بخاری نے پیغام جاری کر دیا

01-23-2026

(لاہور نیوز) وزیر اطلاعات پنجاب عظمیٰ بخاری نے کہا ہے کہ شہری مری کے سفر سے اجتناب کریں۔

صوبائی دارالحکومت سے مری کا سفر کرنے والے کیلئے پیغام جاری کرتے ہوئے وزیر اطلاعات پنجاب عظمیٰ بخاری کا کہنا تھا کہ مری میں تمام ہوٹل مکمل فل ہو چکے ہیں، مری میں برفباری بھی بہت زیادہ ہو رہی ہے۔ اُنہوں نے کہا کہ مری میں گنجائش سے زیادہ گاڑیاں داخل ہوچکی ہیں، اب مزید گاڑیوں کے داخلے کی بھی گنجائش نہیں رہی، اِس لیے سیاحوں سے گزارش ہے اب مری کا سفر کرنے سے گریز کریں، مری کے ہوٹلوں میں بھی اب مزید گنجائش نہیں ہے۔ وزیر اطلاعات کا مزید کہنا تھا کہ مری میں سیاحوں کی حفاظت حکومت کی پہلی ترجیح ہے، مری میں سیاحوں کی بڑی تعداد پہلے سے موجود ہے، التماس ہے شہری مری کے سفر سے اجتناب کریں۔