عظمیٰ بخاری نے اپوزیشن لیڈر معین قریشی کیخلاف ہتکِ عزت کا کیس دائر کردیا

01-23-2026

(لاہور نیوز) وزیر اطلاعات پنجاب عظمیٰ بخاری نے اپوزیشن لیڈر پنجاب اسمبلی معین ریاض قریشی کے خلاف ہتکِ عزت کا کیس دائر کردیا۔

معین ریاض قریشی کے خلاف ہتک عزت کا کیس پنجاب ڈیفیمیشن ایکٹ 2024 کے تحت دائر کیا گیا ہے۔ عظمیٰ بخاری کی جانب سے معین ریاض قریشی کے خلاف 8 کروڑ 40 لاکھ روپے ہرجانے کا دعویٰ دائر کیا گیا ہے۔ عظمیٰ بخاری نے نجی ٹی وی کے پروگرام میں دیے گئے بیان پر قانونی کارروائی کا فیصلہ کیا۔ وزیر اطلاعات پنجاب کے خلاف جھوٹے اور ہتک آمیز بیان پر ڈیفیمیشن ٹریبونل لاہور میں کیس دائر کیا گیا ہے۔ عظمیٰ بخاری کا کہنا ہے کہ مجھ سے منسوب 150/200 پیڈ افراد کو اسمبلی میں داخل کروانے کا الزام بے بنیاد اور من گھڑت ہے، متنازع بیان ٹی وی اور سوشل میڈیا پر نشر ہوا،جس کو لاکھوں افراد نے دیکھا۔ نجی ٹی وی ٹاک شو اور پی ٹی آئی کے آفیشل اکاؤنٹ پر شائع بیان کو ہتکِ عزت قرار دیا گیا۔ درخواست میں ویڈیو، سکرین ریکارڈنگ اور ٹرانسکرپٹس بطور شواہد عدالت میں جمع کروائے گئے ہیں۔ عظمیٰ بخاری نے دائر درخواست میں موقف اختیار کیا ہے کہ جھوٹے الزامات سے عزت، وقار اور ساکھ کو شدید نقصان پہنچا۔ عظمیٰ بخاری کے مطابق الزام بدنیتی، عناد اور غیر ذمہ دارانہ رویے کا مظہر ہے، عوامی شخصیات کی ساکھ کو جھوٹے الزامات سے نقصان پہنچانا عوامی مفاد کے خلاف ہے۔ درخواست میں مؤقف اختیار کیا گیا کہ دعویٰ کا سبب 28 دسمبر 2025 کو پیدا ہوا، عدالت لاہور کو مکمل دائرہ اختیار حاصل ہے، عدالتی فیس 15 ہزار روپے ادا کر دی گئی، ہرجانے کی مجموعی مالیت 8 کروڑ 40 لاکھ روپے مقرر کی گئی ہے۔ عدالت سے استدعا ہے کہ مدعا علیہ کے خلاف ڈگری ہرجانہ اور عدالتی اخراجات ادا کرنے کا حکم دیا جائے۔