شاہین آفریدی آسٹریلیا کیخلاف سیریز کیلئے فٹ قرار، سکواڈ میں شامل کیے جانے کا امکان

01-23-2026

(ویب ڈیسک) آسٹریلیا کے خلاف ہوم سیریز سے قبل اچھی خبر آ گئی ، شاہین آفریدی نے فٹنس ٹیسٹ پاس کر لیا،انہیں آسٹریلیا سے ہوم سیریز کیلیے قومی سکواڈ میں شامل کیے جانے کا قوی امکان ہے۔

تفصیلات کے مطابق شاہین آفریدی کا 2 روز قبل فٹنس ٹیسٹ لیا گیا جس میں خاص طور پر کام کے بوجھ اور طویل المدتی دستیابی کو مدنظر رکھا گیا، طبی ماہرین اور ٹیم مینجمنٹ نے تمام پہلوئوں کا باریک بینی سے جائزہ لینے کے بعد انہیں دوبارہ کرکٹ کھیلنے کے لیے فٹ قرار دے دیا، بائیں ہاتھ کے فاسٹ بولر اب قومی ٹیم کیلئے دستیاب ہوں گے، توقع ہے کہ وہ آسٹریلیا کے خلاف ہوم ٹی ٹوئنٹی سیریز میں ایکشن میں نظر آئیں۔ شاہین آفریدی بگ بیش کے دوران 27 دسمبر کو برسبین ہیٹ کی نمائندگی کرتے ہوئے ایڈیلیڈ سٹرائیکرز سے میچ میں دائیں گھٹنے کی انجری کا شکار ہو گئے تھے،میچ کے 14ویں اوور میں تکلیف محسوس کرنے کے بعد انہیں میدان چھوڑنا پڑا ، بعد ازاں ٹورنامنٹ کے باقی میچز سے باہر ہو کر وطن واپس آگئے۔ برسبین ہیٹ نے ان کی جگہ زمان خان کو سکواڈ میں شامل کیا تھا۔ اسی انجری کے باعث شاہین آفریدی پاکستان کی سری لنکا کے خلاف حالیہ ٹی ٹوئنٹی سیریز میں بھی شرکت نہ کر سکے تھے۔  آسٹریلیا کے خلاف ٹی ٹوئنٹی سیریز کے میچز 29 اور 31 جنوری جبکہ یکم فروری کو قذافی سٹیڈیم لاہور میں کھیلے جائیں گے۔