بغیر تصدیق خبر یا پوسٹ شیئر کرنا جرم قرار، ایڈوائزری جاری

01-21-2026

(ویب ڈیسک) نیشنل سائبر کرائم انویسٹی گیشن ایجنسی (این سی سی آئی اے) نے عوامی آگاہی کیلئے ایک اہم ایڈوائزری جاری کرتے ہوئے خبردار کیا ہے کہ سوشل میڈیا پر ایک غلط کلک یا غیر محتاط پوسٹ شہریوں کیلئے سنگین قانونی مشکلات کا سبب بن سکتی ہے۔

این سی سی آئی اے کے مطابق صارفین کسی بھی خبر، پوسٹ یا لنک کو شیئر کرنے سے قبل اس کی مکمل تصدیق کریں، کیونکہ بغیر تحقیق مواد کو پھیلانا قانون کی خلاف ورزی کے زمرے میں آتا ہے، ایجنسی نے واضح کیا ہے کہ اعلیٰ عدلیہ اور مقتدر اداروں کے خلاف غیر مصدقہ معلومات، جھوٹی خبریں یا گمراہ کن مواد پھیلانا ایک سنگین جرم ہے۔ ایڈوائزری میں بتایا گیا ہے کہ پیکا ایکٹ کے سیکشن 26 اے کے تحت فیک نیوز پھیلانے پر تین سال تک قید کی سزا دی جا سکتی ہے، جبکہ خلاف ورزی کے مرتکب افراد کو 20 لاکھ روپے تک جرمانہ بھی ادا کرنا پڑ سکتا ہے۔ این سی سی آئی اے نے عوام کو ہدایت کی ہے کہ نفرت انگیز مواد، افواہوں اور جعلی خبروں سے مکمل طور پر اجتناب کریں اور سوشل میڈیا کا ذمہ دارانہ اور محتاط استعمال کریں۔ ایجنسی کا کہنا ہے کہ صرف ذمہ دار شہری بن کر ہی سوشل میڈیا اور انٹرنیٹ کو محفوظ اور مثبت پلیٹ فارم بنایا جا سکتا ہے۔