ناقص خوراک کے بیوپاریوں کے خلاف کریک ڈاؤن، مرغیاں اور دیگر ممنوعہ اشیاء تلف

01-20-2026

(لاہور نیوز) وزیرِاعلیٰ پنجاب کی ہدایات پر پنجاب فوڈ اتھارٹی نے ناقص اور غیر معیاری خوراک کے بیوپاریوں کے گرد شکنجہ مزید سخت کر دیا۔

علی الصبح لاہور کی ٹولنٹن مارکیٹ میں بڑی کارروائی کے دوران بیمار اور غیر صحت بخش خوراک کو تلف کر کے ذمہ داروں کے خلاف قانونی کارروائی عمل میں لائی گئی۔ فوڈ اتھارٹی کے مطابق کارروائی کے دوران 7 ہزار 250 کلو بیمار مرغیاں، ایک من سے زائد دودھ اور دیگر ممنوعہ اشیاء تلف کی گئیں، جبکہ ایک ملزم کو گرفتار کر کے اس کے خلاف مقدمہ درج کر لیا گیا، اس موقع پر 64 سپلائرز اور شاپس میں موجود 1 لاکھ 32 ہزار کلو مرغیوں کی تفصیلی چیکنگ کی گئی۔ اسی دوران سبزازار کے علاقے میں ناقص دودھ کی فروخت پر ایک ڈیری شاپ کو بند کر دیا گیا، دودھ کا سیمپل فیل ہونے پر دودھ موقع پر ہی تلف کر دیا گیا اور ملزم کو گرفتار کر کے مقدمہ درج کروا دیا گیا۔ ڈی جی فوڈ اتھارٹی عاصم جاوید کے مطابق میٹ ایس او پیز پر عملدرآمد نہ کرنے والے 4 سپلائرز کو بھاری جرمانے عائد کئے گئے ہیں، خوراک کے کاروبار کیلئے میڈیکل سرٹیفکیٹ اور فوڈ سیفٹی ٹریننگ لازم ہے، جبکہ غذائیت سے بھرپور اور محفوظ خوراک کی فراہمی کیلئے فوڈ بزنس آپریٹرز کو قوانین پر ہر صورت عمل کرنا ہو گا۔ ڈی جی فوڈ اتھارٹی کا کہنا تھا کہ پنجاب بھر میں قوانین کی خلاف ورزی کرنے والوں کے خلاف نو کمپرومائز پالیسی کے تحت کارروائیاں جاری رہیں گی، شہری خوراک سے متعلق شکایات کیلئے ہیلپ لائن 1223 پر اطلاع دے سکتے ہیں۔