برائلر کے نرخوں میں 22 روپے کمی، قیمت 562 روپے کلو مقرر

01-20-2026

(لاہور نیوز) پولٹری مصنوعات کی قیمتوں میں اتار چڑھاؤ جاری ہے۔

تفصیلات کے مطابق برائلر گوشت کی قیمت میں 22 روپے فی کلو کمی کی گئی ہے، جس کے بعد سرکاری نرخ 562 روپے فی کلو مقرر کر دیئے گئے ہیں، تاہم مارکیٹ میں صاف گوشت 620 روپے فی کلو تک فروخت کیا جا رہا ہے، جو مقررہ نرخ سے کہیں زیادہ ہے۔ زندہ برائلر کی قیمت میں بھی 15 روپے فی کلو کمی کی گئی ہے، فارم گیٹ ریٹ پر زندہ برائلر 360 روپے فی کلو مقرر ہے، جبکہ ہول سیل مارکیٹ میں زندہ برائلر 374 روپے فی کلو اور پرچون بازار میں 383 روپے فی کلو میں فروخت ہو رہا ہے۔ دوسری جانب انڈوں کی قیمت میں ایک روپے فی درجن اضافہ کیا گیا ہے، جس کے بعد انڈوں کی سرکاری قیمت 336 روپے فی درجن مقرر کی گئی ہے، اس کے باوجود مارکیٹ میں انڈے مہنگے داموں فروخت کئے جا رہے ہیں، ہول سیل مارکیٹ میں انڈوں کی ایک پیٹی کی قیمت 9 ہزار 960 روپے مقرر کی گئی ہے۔ شہریوں کا کہنا ہے کہ سرکاری نرخ ناموں پر عملدرآمد نہ ہونے کے باعث انہیں مشکلات کا سامنا ہے، جبکہ متعلقہ حکام سے مطالبہ کیا جا رہا ہے کہ قیمتوں پر مؤثر کنٹرول یقینی بنایا جائے۔