رانا ثنا اللہ نے 28ویں ترمیم کے آنے کا بھی عندیہ دے دیا

01-13-2026

(لاہور نیوز) وزیراعظم کے مشیر رانا ثنا اللہ نے 28ویں ترمیم کے آنے کا بھی عندیہ دے دیا۔

پاکستان مسلم لیگ ن کے رہنما اور سینیٹر رانا ثنا اللہ نے کہا ہے کہ صوبائی حکومت کا دہشت گردی پر بریفنگ کے لیے خط لکھنا بدنیتی ہے، تحریک انصاف کو یہ نہیں پتہ کہ پاکستان میں دہشت گردی کون کر رہا ہے، خط لکھنا اور ان کیمرہ بریفنگ مانگنا انتہائی گھٹیا حرکت ہے۔ اُنہوں نے کہا کہ اِن کوشرم آنی چاہیے، ایسی گفتگو کرنے والے شخص پر لعنت بھیجنی چاہیے، ان کیمرہ بریفنگ مانگنی ہے تو ڈیفینس کمیٹی میں آیا کریں، اِس کمیٹی کے اجلاس میں یہ آتے نہیں۔ مشیر وزیرِ اعظم کا کہنا تھا کہ کوشش ہےکہ 28ویں ترمیم میں جو عوامی ایشو رہ گئے ہیں اِن کوشامل کیا جائے تاکہ عام آدمی کے لیے آسانیاں پیدا ہوں۔ وفاق اور صوبوں کے درمیان ایشوز کو اتفاق رائے کے بعد ترمیم کو لایا جائےگا، ووٹرز کی عمر اور حکومت کی مدت بڑھانے سے متعلق قانون سازی پر کوئی بات نہیں ہو رہی ہے۔