لاہور ہائیکورٹ: ججز کیخلاف سوشل میڈیا مہم پر این سی سی آئی اے کو سخت نوٹس

01-13-2026

لاہور: (محمد اشفاق) لاہور ہائیکورٹ نےججز کے خلاف سوشل میڈیا مہم پر این سی سی آئی اے کو سخت نوٹس جاری کردیے۔

لاہور ہائیکورٹ میں اعلیٰ عدلیہ کے ججز کی سوشل میڈیا پر کردار کشی مہم کیخلاف درخواست پر سماعت ہوئی، دورانِ سماعت جسٹس علی ضیاء باجوہ نے ڈی جی این سی سی آئی اے کو 15جنوری کو ذاتی حیثیت میں پیش ہونے کا حکم دیدیا۔ عدالت نے قرار کیا کہ ہم اس معاملہ کی تہہ تک جائیں گے، ججز کی خلاف مہم چلانے والوں کی لسٹیں تیار کریں یہ سائٹ دہشت گردی ہے، آئندہ کوئی ایسی پوسٹ نظر آئی تو ذمہ دار ڈی جی ہوں گے۔ لاہور ہائیکورٹ کے جسٹس علی ضیاء باجوہ نے کیس کی سماعت کی، درخواست گزار کی جانب سے قانونی ماہر میاں داؤد پیش ہوئے جبکہ عدالت حکم پر ایڈووکیٹ جنرل پنجاب امجد پرویز ، ڈائریکٹر این سی سی آئی اے حشمت کمال سمیت دیگر افسران پیش ہوئے جسٹس علی ضیاء باجوہ نے ججز کے خلاف مہم پر کارروائی نہ کرنے پر این سی سی آئی اے پر سخت برہمی کا اظہار کیا۔ جسٹس علی ضیاء باجوہ نے استفسار کیا کہ سرکاری وکیل صاحب بتائیے کیا این سی سی آئی اے کا ازخود اختیار ختم ہوگیا ؟حشمت کمال صاحب آپ پنجاب کے سربراہ ہیں کیوں خاموش ہیں؟ حشمت کمال صاحب بتائیے اب تک ایکشن کیوں نہیں ہوا؟این سی سی آئی اے کیوں سو رہا ہے کیا وجہ ہے ؟ جسٹس علی ضیاء باجوہ نے کہا کہ اتنی خوفناک مہم ججز کے خلاف چلائی جارہی ہے اب تک ذمہ داروں کے خلاف کارروائی نہیں کی، ڈائریکٹر این سی سی آئی اے حشمت کمال نے کہا کہ ہم وقتاً فوقتاً ہر معاملے کو دیکھ رہے ہوتے ہیں۔ جسٹس علی ضیاء باجوہ نے کہا کہ آپ کی قانون کے مطابق یہ ڈیوٹی تھی کہ ججز کے خلاف یا اداروں کے خلاف کوئی ایسا مواد آئے تو آپ از خود اختیارات استعمال کرسکتے ہیں کیوں آپ نے ڈیوٹی پوری نہیں کی؟ سیکشن 37کہتا ہے غیر قانونی کانٹنٹ کو ہٹانے کے لیے اقدامات کیے جائیں گے اب تک کوئی ایک ایکشن نہیں لیا گیا ہے۔ دوران سماعت عدالت نے ایڈووکیٹ جنرل پنجاب امجد پرویز صاحب سے استفسار کیا کہ بتائیں پنجاب حکومت کیا کررہی ہے؟ ایڈووکیٹ جنرل پنجاب امجد پرویز نے کہا کہ پنجاب حکومت ججز کے خلاف کسی مہم کا حصہ نہیں پنجاب حکومت ججز کے خلاف مہم کی مذمت کرتی ہے۔ جسٹس علی ضیاء باجوہ نے کہا کہ پنجاب حکومت کا موقف واضح ہے بتائیں وفاقی حکومت کا کیا موقف ہے ؟ سرکاری وکیل کا کہنا تھا کہ وفاقی حکومت عدالتی حکم پر من وعن عمل کرے گی۔ درخواست گزار کے وکیل میاں داؤد نے موقف اختیار کیا تھا کہ ججز کیخلاف سوشل میڈیا مہم پر این سی سی آئی اے کی خاموشی نے بھی سوالات کھڑے کئے ہیں۔ ججز کیخلاف سوشل میڈیا مہم میں ملوث اکاؤنٹس کیخلاف مقدمات درج کرنے کا حکم دیا جائے، ججز کیخلاف سوشل میڈیا پر موجود توہین آمیز مواد کی مسلسل مانٹیرنگ اور اسے فوری ہٹانے کا حکم دیا جائے، عدالت نے 15جنوری کو ڈی جی این سی سی آئی اے سمیت دیگر افسران کو طلب کرلیا۔