پنجاب میں رمضان بازاروں کیلئے حکمت عملی، عوام کو سہولت دینے کا فیصلہ

01-13-2026

(لاہور نیوز) محکمہ فوڈ سیفٹی اینڈ کنزیومر پروٹیکشن نے رمضان المبارک میں عوام کو سہولیات کی فراہمی کیلئے حکمت عملی تیار کرنی شروع کر دی۔

فیصلے کے مطابق پنجاب کے تمام ماڈل بازار اور سہولت بازار رمضان بازار کے طور پر ڈکلیئر کئے جائیں گے۔ ذرائع کے مطابق رمضان بازاروں میں آٹا، گھی، چینی اور چکن کیلئے الگ الگ سیکشن بنانے پر بھی غور کیا جا رہا ہے تاکہ خریداروں کی سہولت یقینی بنائی جا سکے، ماہ رمضان میں آٹے کی مسلسل فراہمی کے منصوبے کو عملی جامہ پہنانے کیلئے اقدامات کئے جائیں گے اور زائد قیمتوں پر اشیا کی فروخت کے خلاف زیرو ٹالرنس پالیسی کے تحت کارروائیاں ہوں گی۔ چیکنگ کیلئے ڈپٹی کمشنرز کے نمائندگان اور فوڈ سیفٹی افسران تعینات ہوں گے جبکہ روزانہ کی بنیاد پر افسران کی کوآرڈینیشن اور رپورٹنگ کو یقینی بنایا جائے گا، رمضان بازاروں اور منڈیوں میں قیمتوں کا جائزہ لینے کیلئے انفورسمنٹ ٹیمیں براہ راست مانیٹرنگ کریں گی تاکہ عوام کو مناسب نرخوں پر اشیاء دستیاب ہوں۔