سوئی ناردرن گیس کمپنی کو سامان کی کمی، صارفین کے کنکشنز التوا کا شکار

01-13-2026

(لاہور نیوز) سوئی ناردرن گیس کمپنی کو سامان کی شدید کمی کا سامنا ہے، صارفین کے کنکشنز التوا کا شکار ہیں۔

ذرائع کے مطابق سامان کی شدید کمی کے باعث ڈیمانڈ نوٹس ادا کرنے والے سینکڑوں صارفین کے کنکشنز التوا کا شکار ہیں۔ گیس میٹرز پر پابندی ختم ہونے کے بعد کمپنی کو ساڑھے 3 لاکھ سے زائد نئے کنکشنز کی درخواستیں موصول ہوئیں، ان میں سے 1 لاکھ 60 ہزار صارفین  نے 25 ہزار روپے کے ارجنٹ واؤچر جمع کروائے۔ سروے مکمل ہونے کے بعد کمپنی  نے 1 لاکھ سے زائد صارفین کو ڈیمانڈ نوٹس جاری کئے، تاہم 60 ہزار صارفین کو ارجنٹ واؤچر جمع کروانے کے باوجود ڈیمانڈ نوٹس جاری نہیں ہو سکے۔ ذرائع کے مطابق سامان کی کمی کے باعث میٹر لگانے کا عمل انتہائی سست روی کا شکار ہے، سوئی ناردرن کے پاس پائپس، ٹیپ اور میٹرز کی شدید قلت ہے، جس کے نتیجے میں 50 ہزار سے زائد کنکشنز ڈیمانڈ نوٹس ادا ہونے کے باوجود التوا کا شکار ہیں۔