بھکاری مافیا کے خلاف کارروائیاں، 107 بھکاری گرفتار

01-13-2026

(لاہور نیوز) بھکاری مافیا کے خلاف زیرو ٹالرنس پالیسی کے تحت کارروائیاں جاری ہیں۔

ترجمان لاہور پولیس کے مطابق یکم جنوری 2026ء سے اب تک گداگری ایکٹ کے تحت 107 بھکاریوں کو گرفتار کیا جا چکا ہے جبکہ شہر کے مختلف تھانوں میں مقدمات بھی درج کئے گئے ہیں۔ سی سی پی او لاہور بلال صدیق کمیانہ نے کہا ہے کہ بچوں اور خواتین کو ڈھال بنا کر بھیک منگوانے والے عناصر کے خلاف کریک ڈاؤن مسلسل جاری رہے گا، انہوں  نے کمسن بچوں کو گداگری پر مجبور کرنے والوں کے خلاف سخت قانونی کارروائی کے احکامات بھی جاری کئے ہیں۔ سی سی پی او لاہور کا کہنا تھا کہ معیاری تعلیم ہر بچے کا بنیادی حق ہے اور بچوں کے مستقبل سے کھیلنے والے عناصر کسی رعایت کے مستحق نہیں، ایسے افراد کو قانون کے مطابق کیفر کردار تک پہنچایا جائے گا۔