آوارہ کتوں کو فائرنگ اور زہر سے مارنے کیخلاف درخواست دائر

01-12-2026

(لاہور نیوز) لاہور ہائی کورٹ نے آوارہ کتوں کو فائرنگ اور زہر کے استعمال سے مارنے کیخلاف درخواست سماعت کیلئے منظور کر لی۔

عدالت نے پنجاب حکومت، سیکرٹری لائیوسٹاک اور سیکرٹری لوکل گورنمنٹ سمیت دیگر کو نوٹس جاری کر دیئے، جسٹس خالد اسحاق  نے عزت فاطمہ ایڈووکیٹ کی وساطت سے دائر درخواست پر سماعت کی۔ درخواست گزار  نے مؤقف اپنایا کہ آوارہ کتوں کے نام پر آپریشن سے شہریوں کی زندگیاں خطرے میں ڈال دی گئی ہیں، خانیوال میں ڈاگ کلنگ آپریشن کے دوران گولی لگنے سے کمسن بچی کے زخمی ہونے کا واقعہ ہوا۔ درخواست میں کہا گیا کہ رہائشی علاقوں میں فائرنگ اور زہریلی اشیا کا استعمال خطرے سے خالی نہیں، پنجاب حکومت اینیمل برتھ کنٹرول پالیسی 2021 پر عملدرآمد نہیں کر رہی، لاہور ہائیکورٹ فائرنگ اور زہر کے استعمال سے کتوں کو مارنے سے روکے۔ استدعا کی گئی کہ عدالت عالیہ آوارہ کتوں کیلئے ویکسینیشن اور نیوٹرنگ پالیسی پر عملدرآمد کا حکم دے۔