گورنر پنجاب کی جامعہ اشرفیہ آمد، مرحوم مولانا فضل الرحیم کی وفات پر تعزیت

01-08-2026

(لاہور نیوز) گورنر پنجاب سردار سلیم حیدر خان نے جامعہ اشرفیہ لاہور کا دورہ کیا جہاں انہوں نے دارالعلوم جامعہ اشرفیہ کے مہتمم مولانا فضل الرحیم مرحوم کی وفات پر ان کے صاحبزادے اور حافظ اسعد عبید سے اظہارِ تعزیت کیا اور فاتحہ خوانی کی۔

اس موقع پر مشیر وزیرِ اعظم علامہ طاہر اشرفی، سینئر صحافی سہیل وڑائچ، معروف اداکار افتخار ٹھاکر سمیت دیگر شخصیات بھی موجود تھیں۔ گورنر پنجاب سردار سلیم حیدر خان  نے مرحوم مولانا فضل الرحیم کی دینی خدمات کو خراجِ تحسین پیش کرتے ہوئے کہا کہ مولانا فضل الرحیم مرحوم اتحادِ امتِ مسلمہ کے بہت بڑے داعی تھے، انہوں  نے ہمیشہ ملکی وحدت کو مضبوط بنانے کیلئے جدوجہد کی اور امتِ مسلمہ کو جوڑنے کی بات کی۔ بعد ازاں گورنر پنجاب برفانی تودے تلے دب کر شہید ہونے والے پاک فوج کے افسر کیپٹن صمد برزل کی رہائش گاہ پہنچے، جہاں انہوں نے شہید کے والد کو گلے لگایا اور فاتحہ خوانی کی۔ اس موقع پر گفتگو کرتے ہوئے گورنر پنجاب نے کہا کہ پاک افواج کے افسران اور جوانوں کی شہادتیں پاکستانی قوم پر ایک عظیم احسان ہیں، پاک افواج میں ماؤں کے لال وطن کی حفاظت کیلئے اپنی جانوں کے نذرانے پیش کرتے ہیں، تب ہی قوم سکون کی نیند سوتی ہے۔ گورنر پنجاب سردار سلیم حیدر خان  نے دعا کی کہ اللہ تعالیٰ شہید کیپٹن صمد برزل کو جنت الفردوس میں اعلیٰ مقام عطا فرمائے اور ان کے لواحقین کو صبرِ جمیل عطا کرے، یقیناً یہ سانحہ خاندان کیلئے ایک بڑا صدمہ ہے۔