لاہور ہائیکورٹ نے کالعدم ٹی ایل پی کارکن کی بازیابی کی درخواست مسترد کر دی

01-08-2026

(لاہور نیوز) لاہور ہائیکورٹ میں کالعدم تحریک لبیک پاکستان (ٹی ایل پی) گجرات کے کارکن کی بازیابی سے متعلق درخواست پر سماعت ہوئی،چیف جسٹس عالیہ نیلم نے درخواست غیر ضروری قرار دیتے ہوئے مسترد کر دی۔

سماعت کے دوران چیف جسٹس نے درخواست گزار سے استفسار کیا کہ بیٹے کی بازیابی کے لیے پولیس کو درخواست کیوں نہیں دی گئی، جس پر عدالت نے اظہارِ ناراضگی کیا۔ عدالت نے پولیس رپورٹ کو عدالتی فائل کا حصہ نہ بنانے پر بھی برہمی کا اظہار کیا۔ چیف جسٹس عالیہ نیلم نے سوال اٹھایا کہ آئی جی کی رپورٹ عدالتی فائل میں شامل کیوں نہیں کی گئی۔ اسسٹنٹ ایڈووکیٹ جنرل پنجاب وقاص عمر سیال نے عدالت کو بتایا کہ درخواست گزار کے بیٹے عمر شہزاد کے خلاف مقدمہ درج ہے اور وہ ریمانڈ پر ہے۔ درخواست گزار نذیر احمد کے وکیل نے مؤقف اختیار کیا کہ عمر شہزاد کو گجرات میں 14 روز کے لیے نظربند کیا گیا تھا، جبکہ نظربندی ختم ہوئے دو ماہ سے زائد کا عرصہ گزر چکا ہے۔ وکیل نے عدالت سے عمر شہزاد کی بازیابی کے احکامات جاری کرنے کی استدعا کی۔