شہر کے داخلی و خارجی راستوں پر سکیورٹی ہائی الرٹ، ناکہ جات پر چیکنگ

01-07-2026

(ویب ڈیسک) صوبائی دارالحکومت کے داخلی اور خارجی راستوں پر سکیورٹی مزید سخت کر دی گئی۔

ایس پی ڈولفن اختر نواز  نے شہر میں قائم مختلف ناکہ جات کا دورہ کیا اور موقع پر موجود پولیس اہلکاروں کو موجودہ ملکی سکیورٹی صورتحال کے حوالے سے تفصیلی بریفنگ دی۔ ایس پی ڈولفن  نے ناکہ سگیاں، نیو راوی پل، شیراکوٹ اور محمود بوٹی کا تفصیلی دورہ کیا، جہاں انہوں  نے ناکہ جات پر تعینات اہلکاروں کی چیکنگ اور ڈیوٹی کے انتظامات کا جائزہ لیا، اس موقع پر سکیورٹی اقدامات کو مزید مؤثر بنانے پر زور دیا گیا۔ انہوں  نے ای پولیس پوسٹ ایپ کے مؤثر استعمال اور پبلک ٹرانسپورٹ کی چیکنگ مزید سخت کرنے کی ہدایات جاری کیں، انہوں نے تمام ڈی ایس پیز کو ہدایت کی کہ وہ اپنے اپنے ناکوں پر جوانوں کے ہمراہ موجود رہیں تاکہ نگرانی کے عمل کو مزید بہتر بنایا جا سکے۔ حکام کے مطابق ان سکیورٹی اقدامات کا مقصد شہریوں کی جان و مال کے تحفظ کو یقینی بنانا اور کسی بھی ناخوشگوار واقعے سے بروقت نمٹنا ہے، پولیس حکام  نے شہریوں سے بھی اپیل کی ہے کہ وہ سکیورٹی اداروں سے تعاون کریں اور کسی مشکوک سرگرمی کی فوری اطلاع دیں۔