منشیات برآمدگی کیس میں ساڑھے تین سال سے قید ملزم بری

01-07-2026

(لاہور نیوز) لاہور ہائیکورٹ نے دو کلو منشیات برآمدگی کے مقدمے میں اہم فیصلہ سناتے ہوئے ساڑھے تین سال سے قید ملزم کو بری کرنے کا حکم دے دیا۔ عدالت نے ملزم اشفاق کی نو سال قید کی سزا کے خلاف اپیل منظور کر لی۔

جسٹس فاروق حیدر اور جسٹس طارق ندیم پر مشتمل دو رکنی بینچ نے 13 صفحات پر مشتمل تحریری فیصلہ جاری کیا، جسے جسٹس طارق ندیم نے تحریر کیا۔ فیصلے کے مطابق ملزم اشفاق کے خلاف 2022 میں جڑانوالہ پولیس نے دو کلو منشیات برآمدگی کا مقدمہ درج کیا تھا، تاہم پراسیکیوشن کیس پراپرٹی اور سیمپل کی محفوظ تحویل (Chain of Custody) ثابت کرنے اور فرانزک کے لیے بروقت بھجوانے میں ناکام رہی۔ عدالت نے فیصلے میں قرار دیا کہ اگر کسی گواہ کے بیان میں معمولی سا بھی تضاد ہو تو پورا بیان مشکوک ہو جاتا ہے۔ موجودہ مقدمے میں ملزم کی گرفتاری سے لے کر کیس پراپرٹی تک گواہوں کے بیانات میں بے شمار تضادات پائے گئے۔ فیصلے میں مزید کہا گیا کہ منشیات کے مقدمات میں الزام ثابت کرنے کے لیے اعلیٰ معیار کے شواہد درکار ہوتے ہیں، جبکہ موجودہ کیس میں پراسیکیوشن ایسے شواہد پیش کرنے میں ناکام رہی۔ عدالت نے سزا کالعدم قرار دیتے ہوئے ملزم کو فوری رہا کرنے کا حکم دے دیا۔