نارووال ایکسپریس ٹرین کا افتتاح، مسافروں کیلئے سفری سہولیات فراہم

01-06-2026

(لاہور نیوز) نارووال ایکسپریس (پیسنجر) ٹرین کا افتتاح لاہور ریلوے اسٹیشن پر کر دیا گیا۔

افتتاح ڈویژنل سپرنٹنڈنٹ ریلوے انعام اللہ نے دیگر اعلیٰ افسران کے ہمراہ کیا، اس موقع پر پاکستان ریلوے کی ترقی اور کامیابی کیلئے خصوصی دعائے خیر بھی کی گئی۔ افتتاحی تقریب کے موقع پر ٹرین کو رنگ برنگی لڑیوں سے منفرد انداز میں سجایا گیا، جس  نے مسافروں کی توجہ حاصل کی، ڈی ایس ریلوے انعام اللہ  نے ٹرین کی مختلف کوچز کا معائنہ کیا اور دورانِ سفر مسافروں سے فراہم کی جانے والی سہولیات سے متعلق دریافت بھی کیا۔ لاہور ریلوے اسٹیشن سے نارووال پیسنجر ٹرین بروقت صبح 7 بجکر 15 منٹ پر روانہ ہوئی، جو بادامی باغ، شاہدرہ باغ، کالا خطائی، نارنگ، میتھہ سوجا، بدوملی، رعیہ خاص اور پیجووالی سٹاپس سے ہوتی ہوئی صبح 10 بجکر 5 منٹ پر نارووال پہنچے گی۔ اسی طرح نارووال سے ٹرین شام 5 بجے روانہ ہو کر پیجووالی، رعیہ خاص، بدوملی، میتھہ سوجا، نارنگ، کالا خطائی، شاہدرہ باغ اور بادامی باغ سٹاپس سے گزرتے ہوئے رات 7 بجکر 40 منٹ پر لاہور پہنچے گی، مسافروں کی سہولت کے پیش نظر لاہور سے نارووال کا دورانیہ 2 گھنٹے 40 منٹ رکھا گیا ہے۔ نارووال پیسنجر ٹرین کو بہترین صفائی ستھرائی، جدید لائٹنگ اور دیگر آرام دہ سفری سہولیات کے ساتھ چلایا گیا ہے، جبکہ اس میں 10 خوبصورت اور جدید مسافر کوچز شامل کی گئی ہیں۔ افتتاح کے موقع پر مسافروں میں خوشی کی لہر دوڑ گئی، ڈی ایس ریلوے انعام اللہ کا کہنا تھا کہ اپگریڈڈ نارووال پیسنجر نارووال کی عوام کیلئے وفاقی وزیر ریلوے حنیف عباسی کا خصوصی تحفہ ہے، وفاقی وزیر ریلوے کے ویژن کے مطابق مسافروں کی سہولت کیلئے اقدامات مسلسل جاری ہیں۔ افتتاحی تقریب میں ڈویژنل ٹرانسپورٹیشن آفیسر سیدہ مرضیہ زہرا، ڈویژنل کمرشل آفیسر عبداللہ ارشد، ڈویژنل میڈیکل آفیسر ڈاکٹر سمیرا رانا، ڈویژنل مکینیکل انجینئرز عاطف اشفاق اور محمد عمران، ڈویژنل الیکٹریکل انجینئر محمد ناصر، ڈویژنل ایگزیکٹو انجینئر عبدالرحمان اور اسٹیشن مینجر ظفر اقبال بھی موجود تھے۔