ای ایم آئی کی رائلٹی ڈسٹری بیوشن تقریب،معروف موسیقاروں کی شرکت

01-06-2026

(ویب ڈیسک) ای ایم آئی کی جانب سے رائلٹی ڈسٹری بیوشن کی ایک پر وقار اور یادگار تقریب منعقد کی گئی جس میں سدا بہار گیتوں سے مزین محفلِ موسیقی نے شرکاء کو مسحور کر دیا، تقریب میں موسیقی اور شاعری کے شعبے سے وابستہ نامور فنکاروں کو ان کی تخلیقی خدمات کے اعتراف میں رائلٹی کے چیکس پیش کیے گئے۔

تقریب کے دوران معروف موسیقار ایم اشرف، استاد طافو، استاد فرخ فتح علی خاں، ماسٹر عبداللّٰہ، خلیل احمد اور مقبول فرید صابری جبکہ ممتاز شعراء صہباء اختر، فیاض ہاشمی، جمیل الدین عالی اور خواجہ پرویز کو رائلٹی کے چیکس دیے گئے جس پر حاضرین نے بھرپور تالیاں بجا کر ان عظیم فنکاروں کو خراجِ تحسین پیش کیا۔ اس موقع پر بادشاہِ غزل استاد غلام علی خاں، موسیقار ایم ارشد، میکال حسن، گلوکارہ شازیہ منظور، انور رفیع، تنویر آفریدی، روشان انور، عارف بٹ، ڈاکٹر سہیل اور پاکستان آئیڈل سے شہرت حاصل کرنے والے غلام قمبر، رومیسہ طارق، عارفہ صدیقی اور تعبیر علی سمیت شوبز اور موسیقی سے وابستہ کئی اہم شخصیات نے شرکت کی۔ محفلِ موسیقی میں گلوکارہ شازیہ منظور نے اپنے مشہور گیت ’چن میرے مکھنا‘ پر آواز کا جادو جگا کر محفل کو چار چاند لگا دیے جبکہ تنویر آفریدی نے پاکستانی فلم کا معروف گیت گا کر سماعتوں میں رس گھول دیا۔ گنگناتے، جگمگاتے اور رس بھرے گیتوں سے سجی اس رنگا رنگ تقریب میں فنکاروں اور گلوکاروں نے ایک دوسرے کے ساتھ گھل مل کر موسیقی کی خوبصورت روایت کو زندہ رکھا اور یہ تقریب موسیقی کے شائقین کے لیے ایک یادگار لمحہ ثابت ہوئی۔