پنجاب میں مقررہ وقت سے قبل پتنگ بازی پر مکمل پابندی عائد

01-02-2026

(ویب ڈیسک) پنجاب حکومت نے پتنگ بازی کے قانون پر سختی سے عمل درآمد کی ہدایت کرتے ہوئے مقررہ وقت سے قبل پتنگ سازی یا پتنگ بازی پر مکمل پابندی عائد کر دی ہے۔

محکمہ داخلہ  نے کمشنرز، ڈپٹی کمشنرز، آر پی اوز، سی پی اوز اور ڈی پی اوز کو مراسلہ جاری کیا ہے جس میں صوبے بھر میں پتنگ بازی کی ممانعت کے قانون پر سختی سے عمل کرنے کی ہدایات دی گئی ہیں۔ مراسلے میں کہا گیا ہے کہ بعض علاقوں میں غیر قانونی پتنگ بازی تشویش کا باعث بنی ہے اور اس سے راہگیروں کی جانوں کو خطرہ لاحق ہے۔ حکومت پنجاب کی جانب سے بسنت کے موقع پر صرف 6، 7 اور 8 فروری کو لاہور میں محدود پیمانے پر محفوظ اور ثقافتی سرگرمی کے طور پر پتنگ بازی کی اجازت دی گئی ہے، اس کے علاوہ کسی بھی غیر قانونی پتنگ بازی کی سختی سے ممانعت ہے، کیونکہ یہ انسانی جانوں اور عوامی تحفظ کیلئے سنگین خطرہ ہے۔ محکمہ داخلہ  نے واضح کیا کہ پتنگ بازی میں ملوث افراد کے خلاف بلا امتیاز کارروائی عمل میں لائی جائے گی اور تمام کارروائیاں "کائٹ فلائنگ ریگولیشنز بل 2025" کے مطابق ہوں گی، حکومتی اجازت کے بغیر پتنگ سازی اور پتنگ بازی مکمل طور پر غیر قانونی قرار دی گئی ہے۔