پاکستان ریلویز کے فریٹ سیکٹر کو ریکارڈ آمدن ، چھ ماہ میں 17 ارب روپے حاصل

01-02-2026

(لاہور نیوز) پاکستان ریلویز نے فریٹ سیکٹر میں ریکارڈ آمدن حاصل کر لی ، وزیرِ ریلوے حنیف عباسی کے مطابق گزشتہ چھ ماہ کے دوران فریٹ سیکٹر سے 17 ارب روپے حاصل کیے، نومبر، دسمبرمیں ہڑتال کے باوجود ہر ماہ 3 ارب سے زائد ریونیو جمع کیا گیا۔

وزیرِ ریلوے نے کہا کہ مالی سال کے اختتام تک صرف فریٹ سیکٹر سے 38 ارب روپے سے زائد آمدن حاصل ہوگی اور 2026 کے آخر تک پاکستان ریلویز پہلی بار ایک کھرب آمدن والا ادارہ بن جائے گا۔ محمد حنیف عباسی نے مسافروں کو یقین دلایا کہ آنے والے سال میں تمام ٹرینیں اپ گریڈ کر دی جائیں گی تاکہ مسافروں کو محفوظ اور بہترین سفری تجربہ فراہم کیا جا سکے۔ انہوں نے بتایا کہ 2026 میں ٹرینوں میں کیمرے نصب کیے جائیں گے اور ریلوے کی مکمل ڈیجیٹائزیشن بھی مکمل کی جائے گی۔ وزیرِ ریلوے نے مزید کہا کہ ریلوے پولیس کو جدید تربیت دی گئی ہے تاکہ دوران سفر مسافروں کو مکمل تحفظ اور اعتماد حاصل ہو۔