پنجاب پروٹیکشن آرنرشپ ایکٹ کیخلاف آئینی درخواست لاہور ہائیکورٹ میں دائر

12-27-2025

(لاہور نیوز) پنجاب پروٹیکشن آرنرشپ ایکٹ2025 کے خلاف آئینی درخواست لاہور ہائیکورٹ میں دائر کردی گئی۔

درخواست تحریک انصاف کےاراکین پنجاب اسمبلی شیخ امتیاز محمود اور اعجاز شفیع نے دائر کی۔ درخواست میں موقف اختیارکیا گیا کہ ایکٹ کےتحت جائیداد سےمتعلق اختیارات انتظامیہ کو دے کرآئین کی خلاف ورزی کی گئی،ڈسپیوٹ ریزولیشن کمیٹی میں فریقین کو وکیل کے ذریعے پیش ہونے کی اجازت نہیں۔ درخواست میں یہ بھی کہا گیا کہ سول عدالتوں کا دائرہ اختیار ختم کرنا آئین سے متصادم ہے ،ایگزیکٹو اور عدالتی اختیارات کو یکجا کرنا عدلیہ کی آزادی پرحملہ ہے۔ درخواست گزار نے استدعا کی کہ پراپرٹی آرنرشپ ایکٹ اور اس کے تحت ہونے والے تمام اقدامات کالعدم قرار دیے جائیں۔