جسم سے ایک کلو چربی کم کرنا آپکی سوچ سے بھی آسان، تحقیق سامنے آ گئی

12-26-2025

(ویب ڈیسک) آپ روزانہ واک کرنے کے باوجود وزن کم ہونے کا نام نہیں لے رہا تو آپ کی واک بے فائدہ ہے۔

اس کا مطلب ہے کہ آپ اتنا فاصلہ طے نہیں کر رہے جتنا جسم کو چربی جلانے کے لیے ضروری ہے۔ لیکن پریشان ہونے کی ضرورت نہیں، جسم سے ایک کلو چربی کم کرنا آپ کے سوچنے سے کہیں آسان اور محفوظ ہے۔ فٹنس ماہر انجلی سچن کے مطابق، روزانہ باقاعدگی سے واک کرنا وزن کم کرنے کا ایک بہترین اور دیرپا طریقہ ہے، بشرطیکہ اسے مستقل مزاجی کے ساتھ اپنایا جائے۔ ماہر کے مطابق، جسم میں موجود ایک کلو چربی تقریباً 7,700 کیلوریز کے برابر ہوتی ہے، جو توانائی جسم میں ذخیرہ ہوتی ہے، اس لیے اس کا کم ہونا وقت لیتا ہے۔ اصل چربی کا کم ہونا ایک سست مگر مستقل عمل ہے، جو وقتی وزن میں کمی (جیسے پانی کی کمی یا سوجن) سے مختلف ہوتا ہے۔ اچھی بات یہ ہے کہ جب چربی جل جاتی ہے تو واپس نہیں آتی۔ انجلی سچن کے مطابق، واک کے دوران ہر قدم پر جسم توانائی خرچ کرتا ہے، اور تقریباً 1,000 قدم چلنے سے 50 سے 70 کیلوریز جلتی ہیں۔ اس حساب سے ایک کلو چربی کم کرنے کے لیے تقریباً ڈیڑھ لاکھ قدم چلنے پڑتے ہیں۔ اگر کوئی شخص روزانہ 10 ہزار سے 15 ہزار قدم باقاعدگی سے چلے تو وہ 10 سے 12 دن میں ایک کلو چربی کم کر سکتا ہے، وہ بھی بغیر سخت ورزش یا بھوکے رہنے کے۔ ان کے مطابق اصل کامیابی کا راز روزانہ کی مستقل واک ہے، نہ کہ کسی ایک دن کی زیادہ محنت۔