نشے کی خاطر شہریوں سے لوٹ مار کرنے والا گروہ گرفتار

12-23-2025

(لاہور نیوز) نشے کی لت پوری کرنے کیلئے شہریوں سے لوٹ مار کرنے والے گروہ کو پولیس نے بروقت کارروائی کرتے ہوئے گرفتار کر لیا۔

انچارج چوکی سبزی منڈی نے پولیس ٹیم کے ہمراہ خفیہ اطلاع پر کارروائی کرتے ہوئے ملزمان کو حراست میں لیا۔ پولیس کے مطابق گرفتار ملزمان رات گئے گن پوائنٹ پر وارداتیں کرتے تھے اور نشہ خریدنے کیلئے شہریوں کو لوٹتے تھے، ملزمان بابا مکھن شاہ دربار کے قریب ایک اور واردات کی منصوبہ بندی کر رہے تھے کہ اسی دوران پولیس نے کارروائی کرتے ہوئے انہیں گرفتار کر لیا۔ پولیس نے ملزمان کے قبضے سے تھانہ گجرپورہ اور فیکٹری ایریا سے چوری ہونے والی دو موٹر سائیکلیں برآمد کر لیں، اس کے علاوہ ملزمان سے نقدی، دو پستول اور گولیاں بھی برآمد کی گئی ہیں۔ گرفتار ملزمان کی شناخت جون اور وقاص کے نام سے ہوئی ہے، جو اس سے قبل بھی چوری اور ڈکیتی کے مقدمات میں ریکارڈ یافتہ ہیں، پولیس  نے ملزمان کے خلاف مقدمہ درج کر کے مزید تفتیش شروع کر دی ہے جبکہ دیگر ممکنہ ساتھیوں کے بارے میں بھی تحقیقات جاری ہیں۔